Túrkistan oblysynyń Maqtaaral aýdanynda magnıt adam turady, dep habarlaıdy «Adyrna» ulttyq portaly.
Maqtaaral aýdanynyń turǵyny Qılybaı Irsaevty jerlesteri magnıt adam dep ataıdy. Sebebi qarııanyń denesine kez kelgen temir jabysyp qalady. Qasyq, shanyshqy, útik sekildi zattardy denesine jaqyndatsa, teridegi magnıt birden tartyp alady. Odan bólek, 77 jastaǵy aqsaqal 30 metr qashyqtyqta turǵan adamǵa eshqandaı jipsiz áser ete alady.
Jalpy Qılybaı qarııaǵa bul qasıet 1988 jyly darypty. Sol kezde ákesi Monan qaıtys bolǵan. Qaraly jaǵdaıǵa qatty qaıǵyrǵan ul naýqastanyp qalady. Salmaq tastap, reńi de surlanyp ketedi. Qalaǵa baryp, dárigerlerge kóringenimen, nátıje shyqpaıdy. Táýipter men áýlıelerdi aralap, qazaqy emge de júgingen. Degenmen jaǵdaıy jaqsarýdyń ornyna keri kete beripti. Kópshiliktiń keńes berýi arqyly Orazgeldi esimdi aqsaqaldy taýyp, bata alady. Sodan keıin ǵana, densaýlyǵy jaqsara túsedi. Tipti denesinde magnıt paıda bolady.
Alǵashqyda tamaq iship otyryp, qasyqty shekeme alyp barsam, jabysyp qaldy. Ózim tańǵaldym. Sodan deneme jabystyryp kórdim. Arqama alyp bardym. Jabysyp tur. Útikti alyp kelip keýdeme qoıdym. Aýyr salmaqtaǵy útik te «tastaı» bolyp jabysyp qaldy. Úıdegiler jarty metr jerden qasyqtardy maǵan qaraı laqtyryp ta kórdi. Jabysyp qaldy, - deıdi ol.
Keıinnen Qılybaı qarııa ózi de emshilikti qolǵa alǵan. Baltyry syzdap, basy aýyryp kelgen naýqastardy qolyndaǵy tylsym kúsh arqyly emdep júrdi. Denesindegi magnıttik tartylysty adam emdeýge paıdalandy. 1991 jyly Máskeýge baryp, táýiptik qasıetin kórsetip, tájirıbesin de shyńdap keldi.
Denemdegi magnıtti zerttetpedim. Bul maǵan berilgen erekshi tylsym kúsh bolǵandyqtan, boıymdaǵy bul qasıetti adam emdeýge arnadym. Ǵalymdarǵa, dárigerlerge kórsetip, sebebin bilgim kelmedi, - deıdi ol.
Jalpy Qılybaı Irsaevtyń mamandyǵy – aǵylshyn tili pániniń muǵalimi. Mektepte sabaq berip, shákirt tárbıelegen. Basshylyq qyzmetter atqaryp, óńirdiń damýyna úles qosqan. Al zeınetke shyqqan soń qoǵamdyq istermen aınalysa bastady. Atakent kentinde ardagerler keńesiniń tóraǵasy retinde jastar tárbıesi, el birligi jolynda talmaı eńbek etip keledi.
Sondaı-aq shyǵarmashylyqpen de shuǵyldandy. Búgingi kúnge deıin jastardy tárbıeleýge qatysty 5 kitap jazyp shyqty. Qazirgi kezde magnıt adam jubaıy Qyzdarkúlmen 3 bala, 2 qyz ósirip, olardan 20 nemere, 10 shóbere súıip otyr.
«Adyrna» ulttyq portaly
