Jetisýda 14 jastaǵy mektep oqýshysyn zorlady degen kúdikke ilingen 35 jastaǵy azamat ustalǵan bolatyn. "Kámeletke tolmaǵan jasóspirimdi zorlaý" isiniń mán-jaıyn anyqtaý maqsatynda BAQ ókilderi Ǵanı Beısembaevqa túrli saýal joldady, dep habarlaıdy "Adyrna" tilshisi Qaz365.kz-ke silteme jasap.
Jetisý oblysy Sarqand aýdanynyń polıııa qyzmetkerleri er adamdy ustaǵan. Ol Sarqand qalasyndaǵy mektepterdiń birinde 14 jastaǵy oqýshyny zorlady degen kúdikke ilinip otyr.
BAQ betterinde kúdikti 10 jyl boıy Sarqand qalasyndaǵy mektepterdiń birinde muǵalim bolyp jumys istegeni aıtylady. Sondaı-aq ol zorlanǵan balanyń ápkesiniń kúıeýi bolǵany habarlanǵan.
Jaǵa ustatarlyq qylmys Sarqand qalasyndaǵy qonaqúılerdiń birinde bolǵan. Bólmedegi kómek surap, aıqaılaǵan daýysqa qonaqúıdiń meńgerýshisi kómekke kelgen. Ol bólmeni ashqannan soń balany bosatyp, polıııa shaqyrypty. Biraq qylmysker izin sýytyp úlgergen. Al kúdikti bolsa eki kún boıy taýda jasyrynyp jatqan. Ol polıııa qyzmetkerlerine Topolevka aýylynan 10 shaqyrym jerde taýlardyń arasynan ustalǵan.
Jýrnalıst Samal Qabyshevanyń jazbasyna sáıkes, 7 qazan kúni jasóspirimdi zorlaǵan 35 jastaǵy kúdikti 10 jyl boıy Sarqan qalasyndaǵy mektepterdiń birinde matematıka páninen muǵalim bolyp jumys istegen. Zorlanǵan óziniń týǵan baldyzy ári oqýshysy kórinedi.
Májilisten soń osy oqıǵa jóninde Oqý-aǵartý mınıstri Ǵanı Beısembaevqa suraq qoıyldy. Alaıda mınıstr bul oqıǵany ne rastamady, ne teristemedi. Tek tergeýge siltep turyp aldy.
«Jalpy kez kelgen ondaı másele bolsa, azamattar quzyrly organdarǵa júginetinin bilesiz. Ishki ister mınıstrligi kez kelgen zorlaý faktisine aralasyp, óziniń quqyqtyq baǵasyn berýi kerek. Sondyqtan, kez kelgen jaǵdaı tergeý amaldarynda sheshiledi. Biraq balalarǵa qatysty máselelerdi Oqý-aǵartý mınıstrligine qarasty bala quqyqtaryn qorǵaý komıteti baqylaýda ustaıdy. Sebebi bizdiń elimizdegi balalardyń quqyqtary buzylmaýyn qadaǵalap, júıeli túrde baqylaýda ustaıdy», – deıdi ol.
Onyń aıtýynsha, bıyl tamyz aıynyń sońynda Úkimettiń tapsyrmasymen balalardyń quqyǵyn qorǵaýǵa qatysty keshendi jospar qabyldanǵan eken. Mınıstr ata-analarǵa:
«Jalpy mundaı máselede tergeý amaldary júrgiziletinin bilesiz. Óıtkeni tergeý amaldarynan keıin tıisti quqyq qorǵaý organdary óziniń sheshimin aıtýy tıis. Jalpy Qazaqstan boıynsha mundaı keleńsiz jaıttarǵa jol bermes maqsatynda keshendi jospar bar. Ol qyrkúıekten bastap iske asyrylyp jatyr. Keshendi jospar óz nátıjesin beredi», – dep aıtty Ǵanı Beısembaev.
