1 jeltoqsanda Berlın qalasynda Qazaqstannyń Germanııadaǵy elshiligi men Nemis-Qazaq qoǵamynyń uıymdastyrýymen «Wostok» baspasy shyǵarǵan «Mustafa Shoqaı: "Ult bostandyǵy - ulttyq rýhtyń nátıjesi" atty nemis tilindegi kitaptyń tusaý keseri ótti. Bul týraly «Shoqaıtaný» ǵylymı ortalyǵynyń jetekshisi Saǵat Taıman Facebook paraqshasyndp jarııalady, dep habarlaıdy “Adyrna” ulttyq portaly.
Kitapta Qorqyt Ata atyndaǵy Qyzylorda ýnıversıteti "Mustafa Shoqaı" ǵylymı ortalyǵynan alynǵan materıaldar negizinde Túrkistannyń azattyǵy úshin kúresken qaıratker týraly mol maǵlumattar qamtylǵan. Sondaı-aq jınaqqa Baqyt Sadyqovanyń «Mustafa Shoqaı» jáne Marııa Shoqaıdyń «Meniń Mustafam» atty eńbekteri engen.
Tusaýkeserdi Nemis-qazaq qoǵamynyń tóraǵasy Tomas Helm ashty. Budan keıin osy is-sharada arnaıy shaqyrylǵan "Mustafa Shoqaı" ǵylymı ortalyǵynyń ǵylymı jetekshisi, saıası ǵylymdarynyń doktory, professor Á.Q.Bákir dáris oqydy.
Jıynda sonymen birge doktor Bırgıt Braýer jáne aýdarmashy, «Wostok» baspasynyń qyzmetkeri Brıtta Vollenveber sóıledi.
Tusaýkeserden soń jınalǵandar Mustafa Shoqaı jerlengen musylmandar beıitine soǵyp, gúl shoqtaryn qoıdy. Qaıratker rýhyna baǵyshtalyp quran oqyldy.
Qazaqstan Respýblıkasynyń Germanııadaǵy elshiligi Mustafa atamyzdyń beıitin jóndeýden ótkizipti. Kezinde Marııa Shoqaı ornatqan eskertkishti tutas granıt plıtamen jaýyp, oqylýy qıyndap ketken jazýlar altyn tústes boıaýmen jańartylypty.
