«ArselorMıttal Temirtaý» AQ-nyń ataýy resmı túrde QARMET bolyp ózgerdi. Bul týraly Qaraǵandy oblysy ákiminiń baspasóz qyzmeti jazdy, dep habarlaıdy «Adyrna» tilshisi.
Aımaq basshysy Ermaǵanbet Bólekpaev Temirtaýda kompanııa ujymymen kezdesýde Qazaqstan Steel Group akıoneri Andreı Lavrentevti tanystyrdy.
«Árıne, jańa basshynyń aldynda mańyzdy mindetter tur. Birinshi kezekte eńbek qaýipsizdigin qamtamasyz etý jáne qyzmetkerlerge jaǵdaı jasap, ál-aýqatyn arttyrý qajet. Sondaı-aq áleýmettik jobalar arqyly jergilikti qoǵamdastyqty damytýǵa belsendi qatysyp, kómek kórsetý kerek»,— dedi Ermaǵanbet Bólekpaev.
Kezdesýde Andreı Lavrentev Vadım Basındi QARMET kompanııasynyń bas dırektory retinde tanystyrdy.
Esterińizge sala keteıik, buǵan deıin Ónerkásip jáne qurylys mınıstri Qanat Sharlapaev kásiporyndy Andreı Lavrentev satyp alǵanyn jarııalaǵan bolatyn.
