Búgin akademık-jazýshy Zeınolla Qabdolovtyń týǵanyna 96 jyl toldy.
Zeınolla Qabdolov 1927 jyly 12 jeltoqsanda Atyraý oblysy Qyzylqoǵa aýdany Kózdiqara aýylynda turmysy orta, qarapaıym otbasynda týǵan. Ol – jazýshy, fılologııa ǵylymynyń doktory, professor, Qazaqstan Ulttyq Ǵylym akademııasynyń akademıgi, Qazaqstannyń Halyq jazýshysy, Qazaq jáne Qyrǵyz Respýblıkalarynyń eńbek sińirgen ǵylym qaıratkeri.
1945 jyly qazirgi ál-Farabı atyndaǵy Qazaq memlekettik ulttyq ýnıversıtetiniń fılologııa fakýltetine oqýǵa túsip, 1950 jyly úzdik dıplommen bitirgen. Keıinnen osy oqý ordasynda elý jyldan astam úzdiksiz bilim jáne ǵylym jumystaryn qatar júrgizip, qyzmet etken.
Zeınolla Qabdolovtyń aty jazýshy Muhtar Áýezovtiń atymen qatar atalady. 1945 jyly munaı salasynda áke jolyn jalǵaý úshin Almatyǵa kelip, osynda Áýezovpen tanysady. Taý-ken ınstıtýtyndaǵy sabaǵynan shyǵyp, QazUÝ-daǵy Áýezovtiń dárisin tyńdaýǵa jıi kelip júredi. Keıin birjola mamandyǵyn ózgertip, Áýezovke shákirt bolady.
IýNESKO kóleminde álemdik deńgeıde atalyp ótken M.Áýezovtyń 100-jyldyq mereıtoıyna arnaıy jazylǵan «Meniń Áýezovym» atty roman-essesinde uly qalamgerdiń ustazdyq fenomenin tanytý arqyly onyń ádebı beınesin jasaý tájirıbesin jańa sapaǵa kótergen. Esse ádebıetimizdiń altyn qoryna qundy qazyna bolyp quıyldy.
«Halyqtar dostyǵy», «Qurmet», «Parasat» ordenderimen, kóptegen medaldarmen jáne Qazaq KSR Joǵarǵy Keńesiniń Qurmet gramotalarymen marapattalǵan. Qazaqstan Respýblıkasy Ǵylym akademııasynyń Sh.Ýálıhanov atyndaǵy Birinshi dárejeli syılyǵynyń laýreaty. Kórkem shyǵarmalary birneshe shetel tilderine aýdarylǵan.
Almaty qalasyndaǵy meken-turaǵy bolǵan Jeltoqsan kóshesindegi 132 úıdiń qabyrǵasyna memorıaldy taqta ornatylyp, qaladaǵy kóshelerdiń birine jazýshynyń esimi berilgen.
«Adyrna» ulttyq portaly
