Eltańba avtory Jandarbek Málibekov Toqaevtyń málimdemesine qatysty pikir bildirdi. Bul týraly ol «Azattyq» radıosyna bergen pikirinde aıtty, dep habarlaıdy “Adyrna” ulttyq portaly.
Ulttyq quryltaıda Qasym-Jomart Toqaev eltańbany ózgertýdi usynyp, «Qazaqstannyń jańa eltańbasynyń jobasyn jasaýǵa ashyq baıqaý jarııalanady» degen bolatyn.
Jelide bul usynysty qoldamaıtyndar qarasy kóp boldy. Al jaqtaǵandar eltańbadaǵy juldyzdy "Keńes odaǵynyń qaldyǵy» dep jazdy.
Osy synǵa eltańba avtorlarynyń biri Jandarbek Málibekov «Qazaqtyń óz juldyzdary bolǵan» dep jaýap berdi.
“Sovet ókimetinen buryn da qazaqtyń óz juldyzdary bolǵan. Mysaly, Temirqazyq bar. Qazaq halqynyń túsinigi boıynsha árbir adamnyń óz juldyzy bar. Ózbekstan týynda, mysaly, 12 juldyz bar. AQSh týynda 50-den astam juldyz bar. Shyn máninde saraptama kerek. Bárin talqylaý kerek”, — dedi ol «Azattyq» radıosyna bergen pikirinde.
Resmı túrde eltańba avtory bolyp Jandarbek Málibekovke qosa, búginde baqılyq bolǵan Shota Ýálıhanov ta bekitilgen.
Osydan biraz buryn «Adyrna» "Jańa adamdar" jastar qozǵalysy 500 adamǵa saýalnama júrigizip, olardyń 70 paıyzy eltańbany tanymady dep jarııalaǵanyn habarlaǵan. Ile - shala áleýmettik jelide qazirgi eltańbaǵa kóńili tolmaıtyn azamattar arnaıy post jaza bastaǵan.
Sonda depýtat Amanjol Áltaev bylaı degen.
- Árıne, jastarymyzdyń memleketimizdiń úlken boıtumary eltańbany tanymaýy, bilmeýi qabyrǵamyzǵa batatyn jaǵdaı. Endi eltańbany ózgertý kerek degen máselege ózim qosylmaımyn. Óıtkeni bul ábden saraptalyp, taıanaqtalyp, aıqyndalǵan memleketmizdiń eltańbasy. Sondyqtan da ony ózgertýdiń qajeti joq dep esepteımin. Kerisinshe, memlekettik rámizderdi búgingi jas urpaqtyń sanasyna sińirý baǵytynda balabaqshadan bastap, mektep, kolledj jáne ýnıversıtette jastardy aqparattandyrý jumystaryn júıeli júrgizýimiz kerek. Sonymen qatar aqparat quraldary telearna, radıoda memlekettik rámiztanýǵa baǵyttalǵan habar bolý kerek. Mysaly, óz basyma eltańba unaıdy. Eltańba halyqaralyq deńgeıdegi memleketimizdiń beınesin kórsetetin óte joǵary deńgeıde daıyndalǵan. Sondyqtan oǵan qazir aıaq astynan qozǵaý salýdyń ózi durys emes. Jalpy meniń búgingi eltańbaǵa kóńilim toıady, – degen edi depýtat Amanjol Áltaev.
Al taǵy bir depýtat Rınat Zaıytov eltańba men týdy ózgertýge túbegeıli qarsy ekenin aıtqan.
- Sebebi bizdiń eltańbamyz ben týymyz 1991 jylǵy Táýelsizdigimizdiń ıaǵnı, eń birinshi jeńisimizdiń sımvolıkasy. Eltańbany kóp adamnyń tanymaǵanymen de kelisemin. Sebebi nasıhat joq. Mysaly, týymyzdy Túrkııanyń deńgeıinde nasıhattaı almaımyz. Eltańbamyzdy múlde nasıhattamaımyz. Bizde tipti memlekettik rámizderdiń avtorlaryn bilmeıtin tulǵalarymyz bar. Kerisinshe, biz barymyzdy nasıhattaýymyz kerek. Eltańba men tý Qazaqstannyń 1991 jyldan beri paıda bolǵan tulqujaty sekildi dúnıe. Men ony ózgertýge qarsymyn. Elimizde eltańbany ózgertýden de mańyzdy sharýa bar, - degen edi depýtat Rınat Zaıytov.
