Aqtaý garnızonynda komandırdiń qyzmettik ókilettigin asyra paıdalanǵany týraly shý bolǵan is taraptardyń tatýlasýyna baılanysty toqtatyldy, dep habarlaıdy "Adyrna" ulttyq portaly Qorǵanys mınıstrliginiń baspasóz qyzmetine siltep.
«2023 jyldyń tamyz aıynda Aqtaý garnızony áskerı bólimderiniń birinde vzvod komandıriniń merzimdi áskerı qyzmetshilerge qatysty qyzmettik ókilettigin asyra paıdalaný faktisi anyqtaldy. Tergeý sharalary júrgizildi. Aqtóbe garnızony Áskerı sotynyń sheshimimen taraptardyń tatýlasýy boıynsha is toqtatyldy», - delingen seısenbi kúni taratqan habarlamada.
Qorǵanys mınıstrligi «Qazaqstan Respýblıkasynyń áskerı qyzmeti jáne áskerı qyzmetshileriniń mártebesi týraly» zańnyń 26-babynyń 2-tarmaǵyna sáıkes, «sot úkimi zańdy kúshine engennen keıin quqyq buzýshylyqty jasaǵan áskerı qyzmetshi teris sebepter boıynsha Qazaqstan Respýblıkasynyń Qarýly Kúshteri qatarynan shyǵarylady».
«Quqyq buzýshylyqtyń aldyn alý, áskerdegi qarym-qatynastardyń jarǵylyq erejelerin buzýdy anyqtaý jáne jolyn kesý máseleleri qarýly kúshter basshylyǵynyń erekshe baqylaýynda. Olardyń barlyq kórinisteri boıynsha quqyqtyq jáne tártiptik sharalar qoldanylady. Aıta keterligi, qarýly kúshterdegi mundaı buzýshylyqtar oqshaýlanǵan. Bul rette birde-bir is qaraýsyz qalmaıdy. Jedel-izdestirý is-sharalaryn júrgizý barysynda qylmystyq qýdalaý organdaryna jan-jaqty kómek kórsetilýde», - dep atap ótti Qorǵanys mınıstrligi.
