Prezıdent Qasym-Jomart Toqaev bolashaqta sý tasqynynyń aldyn alý sharalaryna aıryqsha mán berýdi tapsyrdy. Ol qorǵanys bógetteri men sý júretin kanaldar salý keregin aıtty, dep habarlaıdy “Adyrna” ulttyq portaly Aqordaǵa siltep.
«Kóktem mezgilinde qar shyǵarý, ózenderdiń qaýipti ýchaskelerindegi muzdy jarý, qarǵyn sý júretin arnalar jasaý jáne basqa da qajetti sharalar aldyn ala júrgizilýge tıis. Jaz-kúz maýsymynda ózenderdiń arnalaryn ýaqytyly tazalaýdy, tabanyn tereńdetýdi jáne saǵalaryn keńeıtýdi, avtomobıl men temirjoldardyń boıyndaǵy qoldanystaǵy sý ótkelderiniń qýattylyǵyn arttyryp, jańasyn salý qajet. Qorǵanys bógetteri men sý júretin kanaldar salý kerek. Bul mindet Respýblıkalyq shtabqa jáne Úkimetke júkteledi», – dedi Memleket basshysy.
Aıta keteıik, búgin Qasym-Jomart Toqaev Batys Qazaqstan oblysyna baryp, sý tasqynyna baılanysty jedel shtabtyń otyrysyn ótkizdi
«Qazir tıisti mekemelerdiń bári belsendi túrde jumys istep jatyr. Birqatar aımaqty qarǵyn sý basyp qaldy. Keıbir jerde tasqyn sý kóterilip jatyr. Bul – tabıǵı apat. Qysqasy, aldymyzda turǵan jumys óte aýqymdy. Bárimiz bir el, bir ujym bolyp osy apatty eńserýimiz kerek. Basqa jol joq. Tasqyn sýdyń saldaryn joıý úshin naqty sharalar qolǵa alyndy. Qaýip-qaterdiń aldyn alý jumystary atqarylýda. Meniń tapsyrmam boıynsha oblystardyń ákimderi jumysqa belsendi kiristi», – dedi Prezıdent.
