Qazaqstandyq kınogerler batyr qyz Álııa Moldaǵulova týraly kórkem fılmdi túsirýge daıyndalyp jatyr, dep habarlaıdy "Adyrna" ulttyq portaly QazAqparatqa siltep.
Fılm Álııa Moldaǵulovanyń 100 jyldyǵyna jáne Jeńistiń 80 jyldyǵyna oraı «Álııa» tolyqmetrajdy kórkem fılmi bolyp 2025 jyldyń mamyr aıynda jaryqqa shyǵady dep josparlanýda.
Qazaqtyń batyr qyzy týraly «Álııa» fılminiń senarıin máskeýlik jýrnalıst, telejúrgizýshi ári aktrısa Alena Kýleshova jazdy.
Jobanyń bas prodıýseri jáne senarısteriniń biri - Aleksandr Shýhov. Oǵan fılm túsirý ıdeıasy 2019 jyly kelgen.
«Qazaqtyń batyr qyzy Álııa Moldaǵulova Ekinshi dúnıejúzilik soǵysqa attanǵanda jasósipirim boldy. Qolyna qarý alyp, mergendik tanytqan ol 78 jaý áskeriniń kózin joıyp, Keńes Odaǵynyń batyry ataǵyn aldy. Bul oqıǵa máskeýlik jýrnalıst, telejúrgizýshi jáne aktrısa Alena Kýleshovany baýrap alǵany sonshalyq, ómiriniń úsh jylyn bıopıktiń senarııin jazýǵa arnady. Mıfter men ańyzdardan bas tartyp, Alena ómirdiń shynaıy shyndyǵyn izdedi. Ol Álııany jaqsy biletin adamdardy taýyp, olarmen áńgimelesti», - dedi Aleksandr Shýhov.
Onyń aıtýynsha, jobaǵa 900 mln teńgeden astam qarajat jumsalady dep josparlaǵan. Fılmniń túsirilim jumystary Qazaqstannan bólek Belarýs elinde ótýi múmkin.
«Álııa» fılminiń rejıssery — Alen Nııazbekov.
«Biz tek senimdi, sarapshylar rastaıtyn jáne moıyndaıtyn faktilerdi qoldanýdy maqsat ettik. Máskeý áskerı muraǵattaryndaǵy jumys nátıjesinde dramalyq materıal úshin dáleldengen negiz jınaldy», - deıdi rejısser.
9 mamyrda jalpyulttyq kastıng ótpek. Shyǵarmashylyq top basty rólde oınaıtyn aktrısany Qazaqstan turǵyndary arasynan izdeıdi.
«Biz senarıımen tanystyq. Álııanyń obrazyn ashatyn 15-16 jastaǵy, boıy 150-155 sm bolatyn qazaq qyzyn áli tappadyq, búkil Qazaqstan boıynsha keń aýqymdy ashyq kastıng jarııalaımyz», - dedi kastıng dırektory Gúlzýra Esen.
Fılmniń túsirilimi kúzde bastalyp, qysta aıaqtalmaq.
