Almatyda 26 mamyrda Qazaq taǧamtanu akademiiasynyŋ prezidentı, Eŋbek Erı, akademik Töregeldı Şarmanovty aqtyq saparǧa şyǧaryp saldy. Akademik aqsaqal 25 mamyrda qaitys bolǧan edı. Marqūmmen qoştasu räsımı Almaty qalasynda S. Asfendiiarov atyndaǧy Qazaq ūlttyq medisina universitetınde öttı. Ol Feisbuk jelısındegı soŋǧy jazbasynda ömırdıŋ ötkınşı ekenın eske alyp, adamzat balasynyŋ mäŋgılık sapar üstınde ekenın aitady.
94 jasqa qaraǧan şaǧynda baqiǧa köşken Töregeldı aqsaqal äleumettık jelıde de belsendı bolatyn. Onyŋ, äsırese, koronavirus pandemiiasy kezınde jelı arqyly aitqan aqyl-keŋesterın köpşılık ūmytpaǧan bolar. Keiın de özınıŋ tüigen oi-paiymdaryn ortaǧa salyp jüretın. Feisbuk betındegı paraqşasynda aqsaqaldyŋ soŋǧy jazbasy 28 aqpanda tırkelıptı. Sol jazbany oqyp otyryp qairan qalasyŋ. Aqsaqal ömır turaly tolǧanyp, baqidy eske alady. «Adam balasynyŋ özıne belgılengen uaqyt – ömırı» jaiynda, «aspandaǧy köp jūldyzǧa ainaluy» turaly aitady. Soŋynda mäŋgılık saparmen tüiındeidı. Osy bırer auyz jazbasynyŋ özınde ömırdıŋ mänın beinelep bere salǧandai äser qaldyrady. Tömende sol jazbany ūsynyp otyrmyz.
Är adamnyŋ ömırı bır salynǧan samal äuendei, aitylǧan aduyn jyrdai, kümbırlegen kümıs küidei, syzdyqtap bastalyp, tolqyndai iırımdenıp, buyrqanyp, qyran qūstai qalyqtap, aşyq aspan astynda kün men aidyŋ nūryna şomylyp, älemge ünın estırtıp, Täŋırdıŋ peşenege jazuymen taitalas-tartys jetegınde jürgende synaptai syrǧyp ötetın, eşkımnıŋ uysynda mäŋgı qalmaityn, är köŋılde arman bolyp ūialap, baqiǧa attanatyn bır tylsym dünie. Adam Ata men Haua Ana zamanynan berı qanşama däuır dübırlep ötkenımen, adam janynyŋ qūpiiasy jūmbaq küiınde qala bermek.
Adam balasy özıne belgılengen uaqyt - ömırın sürıp, önerın körsetıp, qaitadan aspandaǧy köp jūldyzǧa ainalatyndai, ainalmaly tylsym düniedegı bır qonaq tärızdı. Eşbır janǧa ömırge keluınıŋ syry jaily tüsınık berılmegen, boiyna bıtken küş-quaty, jıger-daryny, qany men qasietıne sai jer betındegı özıne daiyndalǧan rölın somdap, tek özıne arnalǧan syi-syiapatyn, quanyş-baqytyn iemdenıp, tauqymetı men qiiametın arqalap, toqtaudy bılmeitın uaqyt diırmenıne tüsıp kete baratyn jalpy adamzat balasynyŋ ǧūmyry mäŋgılık sapar üstınde dese bolar.
Toregeldy Sharmanov
Ūqsas jaŋalyqtar
