Qaıǵyly oqıǵa Uzynaǵash aýylynyń tusynda oryn alǵan. Marqum áıeldiń týystary kúnniń ystyǵyna shydamaǵan júrgizýshi avtobýstyń esigin ashyp, qaýipsizdik erejesin saqtamaǵan deıdi. Al Jambyl aýdanynyń turǵyndary bolsa ábden eskirgen, qapyryq, kir avtobýstardan sharshaǵandaryn aıtty. Ajaly jol ústinde kelgen áıel týystaryn saǵynyp, Mońǵolııanyń Baıan-Ólgeıinen qonaqqa qydyryp kelgen eken, dep habarlaıdy "adyrna.kz" tilshisi Tengrinews.kz saıtyna silteme jasap.
Marqum, 47 jastaǵy Jaınagúl Halyq týǵan jerinen tarıhı otanyna qydyryp kelse kerek. Eki kúnnen soń eline qaıtatyn bolǵan soń ol Almatynyń metrosyn, qalanyń kórikti jerlerin aralaýǵa shyqqan. Týystarymen birge «Altyn Orda» bazarynan avtobýsqa otyrǵan ol Úmbetáli aýylynyń tusynan túsý kerek eken. Biraq Almatyny bilmegendikten mejeli jerden ótip ketken Jaınagúl kenet avtobýs Uzynaǵash aýylyna qaraı burylǵan sátte ashyq turǵan esikten syrtqa ushyp ketken. Et-jaqyndarynyń aıtýynsha, kólikti baıaý júrgen, biraq soǵan qaramastan Jaınagúl tas jolǵa basymen qulap, esin jımaǵan kúıi ketken. Almaty oblystyq Polıııa Departamentiniń resmı ókili atalǵan jaıtqa baılanysty Qazaqstan Respýblıkasynyń Qylmysty kodeksiniń 345 babynyń 3-tarmaǵymen sotqa deıingi tergep-tekserýdiń júrip jatqanyn jarııalady. Saraptamadan soń proessýaldyq sheshim qabyldandy. Jolaýshy qaza bolsa da avtobýs kúndelikti baǵytyda jolaýshy tasýdy áli jalǵastyryp jatyr. Tek rólge ekinshi aýysymdaǵy adam otyrǵan. "Avtobýsta adamdarǵa eshqandaı jaǵdaı jasalmaǵan. Balamen osyndaı ystyqta avtobýsta ketip bara jatyrmyz. Árkim óz qaltasyn oılaıtyn boldy ǵoı. Eshkim eshteńe istep jatqan joq", – deıdi bir jolaýshy. Qaskeleń qalalyq avtoparkine qaraıtyn avtobýstyń zaýyttan shyqqanyna 32 jyl bolǵan. Eski kólik búginde Almaty-Uzynaǵash-Otar baǵytynda júrip, parkke kún saıyn 14 myń teńge ótkizedi eken. Al Almaty-Uzynaǵash arasynda qatynaıtyn 20 shaqty avtobýstyń barlyǵynyń tozyǵy jetken. "Avtoparktiń avtobýstary eskirgen. "Qaskeleń avtopark" jaýapkershili shekteýli seriktestigi basshylyǵyna osylardy aıtyp, hat jazǵanbyz", - dedi Almaty oblysy Jambyl aýdany jolaýshylar kóligi jáne avtomobıl joldary bóliminiń bas mamany Salaýat Ibragımov. Al abaısyzda jolaýshysynan aıyrylǵan júrgizýshi jerleýge jylqy aparyp, kómek kórsetemiz degen jeleýmen marqumnyń týystarynan "keshirdik" degen qolhat ta alyp úlgergen. Qydyryp kep, tarıhı otanynan máńgilik oryn tapqan marqumnyń artynda eki uly qaldy. Al qysta jylýy, jazda jeldetkishi joq eski avtobýstardyń qashan jańarary belgisiz.
"Adyrna" ulttyq portaly
