Elımızde 6 qazan künı AES salu boiynşa referendum ötedı. Osyǧan bailanysty VIII sailanǧan Qazaqstan Respublikasy Parlamentı Mäjılısınıŋ Ekologiia mäselelerı jäne tabiǧat paidalanu komitetınıŋ müşesı Erlan Barlybaevpen AES qūrylysynyŋ ekologiiaǧa äserı turaly bolǧan sūqbatty nazarlaryŋyzǧa ūsynamyz.
- Qoǧamda atom elektr stansiiasyn salu elektr energiiasynyŋ tarifın qymbatatady degen pıkır bar. Būl turaly ne aita alasyz?
- Men būl ıstıŋ mamany bolmaǧannan keiın, maǧan būl sūraqqa jauap beru qiyn. Menıŋ oiymşa, atom elektr stansiiasynyŋ qūny qanşa bolatynyn, qanşa uaqytty qajet etetının, tariftıŋ qandai bolatynyn ükımettıŋ nemese uäkılettı organ esepteuı kerek. Būl turaly aitylmaǧandyqtan qoǧamda tarif köterıluı mümkın degen pıkır paida boldy
- Sızdıŋ oiyŋyzşa, AES qūrylysy elektr quatynyŋ tapşylyǧyn şeşe me? Ükımettıŋ Qazaqstan Respublikasynyŋ aumaǧynda atom elektr stansiialaryn ıske qosu jönındegı josparlary qanşalyqty senımdı?
- İä, atom elektr stansiiasyn salu arqyly elektr energiiasynyŋ tapşylyǧyn şeşuge bolady. Ükımet ūsynǧandai, bükıl elektr energiiasy naryǧynyŋ 10%-y AES esebınen şeşıledı dep oilaimyn. Būl – aitarlyqtai jetkılıktı kölem.
- Elımızdegı ekologiialyq qoǧam Balqaş kölınıŋ bolaşaǧy turaly alaŋdauda. AES saludan Balqaş kölıne qauıp bar ma?
- Menıŋşe, Balqaştyŋ bolaşaǧyna qauıp töndıretın närse joq. Öitkenı qazırgı tehnologiia sudy az tūtynuǧa mümkındık beredı. Sondyqtan, bolaşaqta bükıl qūrylys kezınde Balqaş üşın qauıp nemese mäsele tuyndamaidy dep oilaimyn.
- Atom elektr stansiialarynyŋ qaldyqtary jergılıktı halyqtyŋ densaulyǧyna qalai äser etuı mümkın?
- AES-tıŋ qaldyqtary baqylauda bolatyndyqtan qauıp töndırmeidı. Bügıngı küngı tehnologiia täuekelderdı barynşa azaituǧa mümkındık beredı. Menıŋ oiymşa, būl jerde tolyq igerıletın bolady. Qaldyq qalǧannyŋ özınde olardy saqtauǧa bolatyn oryndar bar. Sondyqtan eşqandai qauıp joq.
- Atom elektr stansiiasynyŋ qūrylysy aimaqtyŋ damuyna jäne jalpy el üşın qanşalyqty äser etedı dep oilaisyz?
- Bırınşıden, būl jūmys oryndarynyŋ köbeiuı men jaŋa tehnologiialardyŋ artuyna äser etedı. Ekınşıden, atom energetikasynyŋ damuyna yqpal etedı. Al mūnyŋ barlyǧy el ekonomikasyna oŋ äserın tigızedı dep esepteimın
Ūqsas jaŋalyqtar
