Jetısu oblysynyŋ qylmystyq ıster jönındegı mamandandyrylǧan audanaralyq sotynda 2023 jyly 4 qazanda bolǧan janjal kezınde 16 jastaǧy Şerzat Polattyŋ qaza tabuyna bailanysty ıs boiynşa sot prosesı jalǧasyp jatyr. Iste bırneşe adam aiyptaluşy retınde jauap berude, dep habarlaidy "Adyrna" ūlttyq portaly Qazaqparatqa sıltep.
Sot otyrysynda negızgı figuranttardyŋ bırı — Nūrbol Toqtaubaev jauap berıp, sol tünı bolǧan oqiǧalar jaiynda egjei-tegjeilı baiandady. Onyŋ aituynşa, oqiǧa aldynda ol dostarymen «Eiforiia» kafesınde otyrǧan. Keiın Darhan Äskentai esımdı tanysynan qoŋyrau kelıp, "Qamajai" dükenıne keluın ötıngen.
«Dükenge barǧanda Darhannyŋ betınen qan aǧyp tūrdy. Ol “dükenşınıŋ balasy ūryp kettı” dedı. Men dükenge kırıp, Qarjaubaimen söilestım. Ol jaǧdaidy ärtürlı tüsındırdı. Aqyry 1,5 myŋ teŋge artyǧymen tölep, dosym üşın keşırım sūrap, ketıp qaldyq», – dedı Toqtaubaev.
Alaida ol keiın jolda Darhannyŋ oqiǧanyŋ män-jaiyn tolyq tüsındırmegenın estıp, dükenge qaita oraludy jön körgenın aitty. Onyŋ sotta aitqanyn sözınde, sol jerde qaqtyǧys örşıp, Qarjaubai «menımen nemese balammen şyq» dep ses körsetıp, pyşaq taqap qorqytqan. Būdan keiın jaǧdai şielenısıp, Nūrbol bauyrlaryn şaqyrǧanyn aitty.
«Qarsy tarap telefon arqyly adamdar şaqyrdy. Artynşa töbeles bastaldy. Men düken ışınde boldym. Sol jerde Nūrqanat myltyqpen ekı ret atty – bırınşısı aspanǧa, ekınşısı jerge. Özım tek Nūrqanatty bır-ekı ret tepkenımdı moiyndaimyn. Şerzat jaqqa barmadym, araqaşyqtyq 4-5 metr boldy», – dep tüsındırdı aiyptaluşy.
Sonymen qatar, Nūrbol Toqtaubaev äleumettık jelıde taralǧan beinejazbalarǧa qatysty da pıkır bıldırıp, özınıŋ sabyrǧa şaqyryp jürgenın, eşkımdı arandatyp nemese töbeleske itermelemegenın alǧa tartty.
Sotta kuäger tüsırgen Şerzat pen Nūrqanattyŋ soqqyǧa jyǧylǧan sätı de körsetıldı. Toqtaubaev būl videodaǧy özınıŋ ıs-äreketın mäjbürlı qadam dep atady. Advokattardyŋ sūraǧyna jauap bergende, ol Şerzattyŋ 16 jasta ekenın bılmegenın, sondai-aq marqūmnyŋ anasy – Gülbara Bişımbievanyŋ ony toqtatuǧa äreket etpegenın de atap öttı.
