Almaty oblysy, Şelek auylynyŋ 1982 jylǧy tumasy, jük kölıgınıŋ jürgızuşısı Nūrjan Janaev BAQ pen qūzyrly organdardan kömek sūraidy. Otandasymyz bes künnen berı kedendık qūjattarǧa bailanysty Äzerbaijan aumaǧynan şyǧa almai otyr.
Jürgızuşınıŋ aituynşa, ol Qytaidan Äzerbaijanǧa bırınşı ret kölık tasymaldap barǧan. Būl saparynda ol segız kölık alyp barǧan, är ekı kölıkke bır CMR jükqūjaty räsımdelgen. Barlyǧy tört CMR qūjaty bolǧan.
«Men barlyq qūjattardy tekseruge terezeden berdım. Qaitarǧanan keiın baiqasam, qolymdaǧy qūjattar tolyq emes, ışınde bır-bır paraqtan joq. Bır qūjatta üş bettıŋ bıreuı joq, ekınşısınde şot-faktura jetıspeidı. Solai alyp qalǧan siiaqty. Özım joǧaltsam tolyq qūjatty joǧatpaimyn ba, arasynan bır-bırden emes», — deidı Janaev.
Ol Äzerbaijannan şyǧuǧa äreket jasaǧan kezde, şekara qyzmetkerlerı qūjattardyŋ tolyq emestıgın aityp, ony ötkızuden bas tartqan.
«Men Qytaidan qūjattardyŋ köşırmesın sūradym, olar maǧan PDF formatynda jıberdı. Söitıp joq qūjattardy toltyrǧan boldym, bıraq endı olarda Reseidıŋ qyzyl mörı boluy kerek
Ol mör qolyndaǧy qūjattyŋ köşırmesınde anyq körınıp tūrǧanyn aitady. Qūjatty qabyldap alǧan kezde tüpnūsqany alyp qalyp, köşırmesın beredı, sol köşırmede qyzyl mör bar. Alaida ony qabyldamai otyr, deidı ol.
Jaǧdaidy qiyndatyp tūrǧan jait — şekarada onyŋ tölqūjatyn kepıl retınde alyp qoiǧan.
«Al endı mör qoi dep jatyr, al mende qūjat ta, tölqūjat ta joq bolǧandyqtan, ol jerge (terminalǧa – red.) kıre almai otyrmyn», — deidı ol.
Janaevtyŋ aituynşa, ol Qazaqstan elşılıgıne de jügıngen. Konsul Äsel esımdı qyzmetker kömektesemın dep uäde bergen, bıraq uäde oryndalmaǧan.
«Ol «qazır, qazır» dedı, bıraq bıraz uaqyt ötkenımen, eşqandai äreket jasamady. Menıŋ kölıkte jatqanyma bes kün boldy», — dedı jürgızuşı.
Ol osy mäselege BAQ nazar audarsa, deidı. Öitkenı Qūrban aitqa bailanysty şekara jabylsa, jaǧdaiy müldem qiyndaǧaly tūrǧanyn aitady.