Ońtústik Koreıaǵa Seýlge kelgeli úshinshi kún. Biz em alyp jatqan klınıkanyń qasyndaǵy dúkenderde baǵanyń sharyqtap turǵanyn keshe ańǵardym. Búgin bazarǵa baryp Seýldiń bazaryn kózben kórdim. Kómekke karta men gýgl aýdarmashy keldi. Sonymen ne túıdim?
Birinshi ańǵarǵanym, káristerdiń bazary túski 12-den, keshki 12-ge deıin jumys isteıdi. Bazarlary taza, ári jınaqy. Saýdagerleri adal. Shetten keldiń dep aldap qalý joq.
Sebebi bazarda kamera jáne tólem jasaý kezinde saýdagerdiń jumysyn baǵalaıtyn qurylǵy turady. Zań qatal..
Bazarǵa kire salysymen ettiń baǵasyn bilgim keldi. Sebebi klınıkanyń qasyndaǵy dúkende 100 gramm et 10 dollar. Bul bizdiń teńgemen 3870 teńge.
Bazarda 400 gramm et 8500-9000 von eken. Teńgege shaqqanda 3433teńge.. Balyqtyń bir kelisi 10000 von.
Sonda bul jaqta bir keli balyqty 3800 teńgege alady ekenbiz. Qulpynaıdyń bir kelisi 5900 von.
Teńgege shaqqanda bir keli qulpynaı 2322 teńge. Salystyra bersek, bizdiń teńgemen shaqqanda Seýlde ómir súrý qıyndaý. Al ózderiniń jalaqysy joǵary bolǵandyqtan olarda ómir súrý sapasy jaqsy. Máselen 4000 dollar jalaqy alatyn muǵalimder otbasy bul jaqta aýqatty otbasy sanalady. Ol úshin muǵalimderge tek qana Koreıanyń ýnıversıtetin bitirse bolǵany. Ári qaraı jumysyn istep eńbek ótilin tolyqtyryp balalarǵa bilimin berip júre beredi.. Bizdegi tárizdi muǵalimdi qoǵamdyq jumysqa jegý bul elde joq eken. Muǵalim tek bilimin berip, balalardyń ıntelektýaldyq deńgeıin damytýǵa mindetti. Muny estip "ustazdaryna qoqys jınatyp, qoǵamdyq jumysqa jegip, saılaý bolsa tań atqansha daýys sanatyp qoıatyn el biz ǵana ma eken" dep oıladym...
Al dárigerlerine qoıatyn talap erekshe, soǵan oraı ol eń qurmetti mamandyq. 'Jańa bazarǵa ketip baramyn" degenimdi estip klınıkadaǵy qyzdar "adasyp ketseńiz konferenııaǵa kelgen dárigermin deńiz, kez kelgen káris ózderi tegin ákelip tastaıdy" dedi. Osydan-aq, dárigerge qurmetti baıqaýǵa bolady. Bul elde dárigerge rahmetin aıtyp, aqsha qystyrý degen joq. Koreıada dárigerdiń para alýy tirideı ólgenmen teń.
Bul elde avtobýspen júrý quny 487 teńge. Avtobýspen jeńildikpen muǵalimder men dárigerler júre alady jáne úsh balasy bar analar avtobýsta tegin júredi. Al kóp balaly analarǵa járdemaqy bólý máselesi Ońtústik Koreıada ońdy sheshilipti. Koreıada járdemaqy eki balasy bar analardan bastap tólenedi. Eki balasy bar ana 1800 dollar, úsh jáne tórt balasy bar analar 2000 dollar memlekettik járdemaqy alady. Buǵan aı saıynǵy túsimine qaraı jergilikti aýdan bıýdjetinen qarajat qosa bólinip otyrady. Halqyna jaǵdaı jasalǵan, adamı qundylyqtardy damytýǵa barynsha kúsh salǵan el eken. Osyǵan qarap bizdiń elde áleýmettiń jaǵdaıy ońalýy áli talaı-talaı saýatty qadamdar kerek ekenin eriksiz moıyndaısyń...
Qarlyǵash Zaryqhanqyzy
"Adyrna" ulttyq portaly
Almaty-Ońtústik Koreıa-Seýl
