BŪŪ ökılderı COVID-19 ındetınıŋ taraluyn azaitu maqsatynda Qazaqstandaǧy kedeilerge uaqytşa 60 myŋ teŋgeden järdemaqy berıp, üide otyra beruın qamtamasyz etudı jön sanaidy. Būl turaly BŪŪ-nyŋ Damu baǧdarlamasynda aitylypty.
Baiandama avtorlary qazaqstandyq kedei otbasylardy aştan saqtaudyŋ bırneşe nūsqasyn ūsynǧan. Bırınşı nūsqa boiynşa ūsynylatyn aqşa kölemı kedeilıktıŋ şegınen şyǧuǧa kömektespeidı degen sarapşylar ekınşı nūsqa boiynşa körsetılgen ortaşa ömır süruge jetetın somany körsetıptı.
BŪŪ sarapşylar aitqan bırınşı nūsqa -$136,91, iaǧni 56 600 teŋge. Al ekınşısı -$150,23, iaǧni teŋgemen 62 200. Sonymen qatar baiandama avtory pandemiia kezınde äsırese, resmi jūmys ıstemeitın adamdardyŋ, bosqyndar men migranttardyŋ memleket tarapynan berıletın kömekterden qūr qalǧanyn, anaǧūrlym artyq zardap şekkenın alǧa tartady. Osyǧan bailanysty halyqaralyq ūiym 132 damuşy elderdegı 2,7 mlrd adamdy memleket tarapynan uaqytşa qarjylai kömek körsetuge şaqyrady. Būl kedeiler sany köp degen jüzdegen eldıŋ qatarynda Qazaqstan da bar.
Halyqaralyq ūiymnyŋ mynadai ūsynysyn qazaq bilıgı nazarǧa ala qoiar ma eken? Sebebı, karantin saldarynan aqşasyz, jūmyssyz üiınde qamalǧan halqyna 42 500 teŋgenıŋ özın äreŋ berdı. Onda da būl aqşanyŋ basym bölıgı «ūstaǧannyŋ qolynda, tıstegennıŋ auzynda» kettı.
Mäselen, alǧaş ret 42 500 teŋge taǧaiyndalǧanda, osy aqşany aluşydan görı, qoly jetpegender köp boldy. Desek te, 4,5 mln qazaqstandyqqa 42 500 teŋge berıp, qaryq qyldyq degen Qazaq bilıgı biylǧy şılde aiynda osy aqşany taǧy bır retten berıletının habarlady. Būl joly da, aldyŋǧy jaǧdai taǧy qaitalanuda. Almadyq degenderdıŋ qarasy mol.
Halqyna 42 500 teŋgenı teŋ ülestıre almai otyrǧan Qazaqstan «BŪŪ-nyŋ baiandamasyna säikes» dep halqyna alpys myŋ teŋgeden taratyp bere qoimasy anyq. Desek te, damyǧan otyz eldıŋ qataryna kıremız dep jürgende, kedei elderdıŋ qatarynan bır-aq şyqqanymyz öte ökınıştı.
Meruert HUSAİNOVA,
«Adyrna» ūlttyq portaly.
