Jas aqyndardyń óleńin oqyǵandy janym súıedi. Olardyń óleń jazǵan kezderindegi alaýlaǵan júzderin, nur oınaǵan kózderin elestetemin, lúpildegen júrekterin tyńdap otyrǵandaı bolamyn.
Mine, men qazir Qurbangúl Aǵabek degen jas aqyn qyzdyń óleńderin oqyp, ózin áli tanyp, bilmesem de, názik sezimderine rızashylyǵymdy sezdirgim kelip otyr.
«Búldirgen balalyq» degen óleńniń ón boıynan boı jetip, oı toqtatqan qyz balanyń ótip ketken balalyq bal dáýrenge degen saǵynyshy ańqyp tur eken.
Aqyn qyz alty‑aq shýmaqtan turatyn osy óleńinde bala kezdegi búldirgen tere barǵan sátterin elestete kelip, adam ómiriniń ótkinshiligin, sol úshin ár pendeniń kókiregi kúrsiniske tolatynyn bir leppen ǵana jetkize salǵan.
Sókpeýshi edi ájemiz, anamyz da.
Senip ósken bala edik san ańyzǵa.
«Qazaq jeri – keń!» deıtin ájem jıi,
Nege erkindik joq búgin qalamyzda?!
Aýyl keshin saǵynam – jaıdary baq,
Bulaq aǵyp jatatyn saıǵa qulap...
Keıde aınadan búldirgen qyzdy izdeımin,
Birtúrli bir tulǵaǵa aınalyp ap.
Qurbangúldiń qyp‑qysqa óleńderi óziniń móldirligimen, áserliligimen sáýir bultynyń tamshysyndaı bolyp qýantady, qyz balaǵa ǵana tán qupııalaý sezimderimen oılantady.
Árıne, jastyq shaqtyń negizgi jyry – mahabbat.
Mine, bul avtordyń da sondaı óleńderimen kezdestim. Oqyp otyryp, osy óleńderdiń ortaq keıipkeri óz júreginiń lúpilin ǵana tyńdap, ansarǵa toly pák‑pák armandaryn jetkize almaı júrgen bir arý ekenin baıqadym.
Ol «Syltaý» degen óleńniń basqy eki shýmaǵynda ózi yntyǵyp júrgen bir adamǵa qarata saǵynyp júrgenin aıtady da, ile‑shala:
Hat‑habarsyz sezimime shek qyldyń,
Qylyǵyna qyzyǵýshy em tekti uldyń.
Jarty aı júrip, syltaý izdep taptym da,
Esigińe kep turmyn...
Jubatatyn jalǵyz sensiń jandy shyn.
Óleń boldy aıtar saǵan alǵysym.
Qaltyraǵan qolym esik qaǵyp tur,
Týk! Týk!
– Armysyń! – dep, tilmen jetkize almas ishki sezimderin qımyl‑áreketimen‑aq kórsetip turǵandaı bolady.
Qurbangúldiń osy tektes keıingi óleńderine de kóz júgirte otyryp, ózine tán jazý máneri qalyptasyp qalǵanyn baıqadym. Ol óziniń jetkizer oıynyń ishki maǵynasyna erekshe nazar aýdaratyn sııaqty. Sondyqtan bolar, astarly tuspaldarynan birtalaı syr ańǵarǵandaı bolyp, tushynyp qalady ekensiń!
Ol, kóbinese, ár óleńdegi ár shýmaqtyń sońǵy jolynyn býyn sanyn qysqartý arqyly erekshe ekpin túsirip, aıtar oıyn aıqyndaı túsýge daǵdylanyp alypty. Máselen, bir óleńinde:
Siz de, men de bir baqytty sezemiz,
Biraq, nege umtylý joq?
Belgisiz!
Jaǵalaýǵa taıap tur ǵoı kememiz,
Qol sozyńyz endi siz!
Endi bir óleńinde:
Kesirińnen kesilipti gúldeı muń,
Kóńilime kelip qondy úıdeı muń.
Saǵan óleń jazǵandyǵym bolmasa,
Súımeımin!
Qysqartyp aıtqanda, bul aqyn qaryndasymyzdan úlken úmit kútip otyrǵan jaıym bar.
Ábýbákir Qaıran,
“Adyrna” ulttyq portaly
