Qostanaı qalasynyń ortalyq alańyna aǵartýshy, ǵalym Ybyraı Altynsarınniń eskertkishi qoıyldy. Bul týraly QazAqparat-qa silteme jasap, "Adyrna" ulttyq portaly habarlaıdy.
Y.Altynsarınniń 180 jyldyǵy qarsańynda ashylǵan eskertkish Altynsarın-Tolstoı kósheleriniń qıylysynda ornalasqan. Onyń salynýyna Qostanaıdaǵy pedagogtar men eńbek ardagerleri, ybyraıtanýshylar muryndyq boldy. Saltanatty sharaǵa Qostanaı oblysynyń ákimi Arhımed Muhambetov, pedagogıkalyq eńbek ardagerleri, qoǵam qaıratkerleri qatysty. Óńir basshysy atap ótkendeı, eskertkishtiń ashylýy qazaq qoǵamynyń damýyna, bilim berý júıesiniń qalyptasýyna baǵa jetpes úles qosqan kórnekti tulǵanyń mereıtoıyn atap ótýdegi atqarylatyn jumystardyń bastamasy bolyp otyr.
«Tuńǵysh aǵartýshy Ybyraı Altynsarın eskertkishiniń boı kóterýi – elimizdegi tarıhı oqıǵalardyń biri.
Qazaqtyń daryndy tulǵasy eldegi halyq aǵartý isi tarıhynda ólsheýsiz eńbek sińirdi. HIH ǵasyrdyń ekinshi jartysynda qazaq dalasynda mektep jumysyn uıymdastyrýdyń maǵynaly jobasyn jasap, halyq mektebiniń negizin qalady. Bul uly babanyń eline sińirgen eńbeginiń bir parasy ǵana. Kelesi jyly bolatyn aıtýly jobalar búgingi sharadan bastaý alady. Biz tek eskertkish ashýmen toqtamaımyz. Qaladaǵy Altynsarın kóshesi tolyq jóndeýden ótedi. Oǵan qazynadan 900 mln teńge bólindi. Bul jumystar jalǵasa beredi», - dep atap ótti Arhımed Muhambetov.
Eskertkishti belgili músinshi J.Jubanqosov pen QR Sýretshiler odaǵynyń múshesi T. Ermekov birlese jasaǵan. Qurylys qoladan, tuǵyrdyń túbinen tómengi bóligine deıin granıtten jasalǵan. Qola kompozıııasynyń jalpy bıiktigi plınttiń tómengi núktesinen – 2,6 metr.
