Baıden AQSh-taǵy eń tómengi jalaqyny saǵatyna 15 dollarǵa deıin kóterýge ýáde berdi dep habarlaıdy «Adyrna» ulttyq portaly Twitter jelisindegi Djo Baıdenniń jazbasyna silteme jasap.
Amerıkalyq BAQ prezıdenttik saılaýda jeńiske jetti dep habarlaǵan Djo Baıdan halqyna eń aldymen baılyq syılamaq. Syılaǵanda, qaltasynan bólisip bermeıdi. Árbir jumys saǵatynyń qunyn arttyrý arqyly amerıkalyqtardyń qaltasyn qalyńdatpaq. Qazaqtyń teńgesine shaqqanda, árbir jumys saǵaty shamamen 6 500 teńgedeı bolady. Endi muny qazaqy mıymyzda eseptep kep jibersek, kúnine kem degende bes saǵat jumys istese, 32 500 teńge. On kúnde jalaqyńyz 325 000 teńge. Al endi otyz kúnde...
Baıden mundaı sheshimge pandemııadan týyndaǵan daǵdarys saldarynan kelgenin aıtady.
Onyń aıtýynsha, pandemııadan týyndaǵan daǵdarystan keıin el qalpyna kele bastaǵanda, saǵattyq jalaqy ósedi.
"Biz muny joǵary jalaqymen, sonyń ishinde 15 dollarlyq eń tómengi jalaqymen, jaqsy jeńildiktermen jáne otbasyńyzben qamtamasyz etýge múmkindik beretin kúshti ujymdyq sharttarmen jasaımyz", — dep jazdy Baıden. Osylaısha, 8 saǵattyq jumys kúniniń eń tómengi tólem mólsheri 120 dollardy nemese shamamen 51 430 teńgeni quraıdy.
AQSh Eńbek mınıstrligi belgilegen eń tómengi jalaqy qazir saǵatyna $7,25 quraıdy – 3 100 teńgeden sál artyq.
Baıqasańyzdar, qazirdiń ózinde de amerıkalyqtardyń saǵattyq jalaqysy az emes. Al endi osy qatarǵa bizdegi jalaqynyń saǵattyq mólsherin qoıyp, salystyryp jibersek. Árıne, kúlkili ári óte uıat jaǵdaıǵa tap bolarymyz anyq. Desek te, kóreıikshi. Bizdegi ortasha aılyq jalaqy shamamen 150 myń teńgeni quraıdy. Saǵat emes, kúndik jalaqymyzdyń ózi 5 myńnan áreń asady eken. Al saǵatqa shaqsaq... ár saǵatymyzǵa 1000 teńgeden keledi. Onyń ózinde kúnine bes saǵattan jumys istesek. Al umytpasaq, Qazaqstanda kemi segiz saǵattyq, al shyndyǵynda on saǵattan jumys isteıtinder kóp. Demek, ár saǵatymyz 500 teńgeden eken. Bir AQSh dollarynan sál ǵana asady. Al qazirgi pandemııa kezinde bar jumysynan aıyrylyp, úkimetke alqan jaıqan halqyna bılik qansha teńge bergeni árkimniń esinde máńgi saqtalatyn shyǵar. Sol karantın kezinde taryǵyp qınalǵan sátterdi eske alǵanda, á degennen halqynyń qaltasynyń qamyn oılaǵan prezıdentten aınalyp ketedi ekensiń. Qazaqstanda tek urandatqan bastamalar bar. Júzege asyp, halyqtyń áleýmettik jaǵdaıyna úlken yqpal etip jatqan bastamalar men urandar saýsaqpen sanarlyq qana shyǵar, sirá. Soǵan qaramaı, damyǵan elderdi betke alyp, sol kóshke qosylýǵa asyǵyp ketip barady elimiz. Kúleıik pe, jylaıyq pa?
Raýana DIMAShQYZY,
"Adyrna" ulttyq portaly.
Foto ashyq derekkózden alyndy.
