Ońtústik Koreıada bir kúnde arnaıy test qorytyndysy 1030 adamnyń Covid juqtyrǵanyn anyqtaǵan. Koronavırýs pandemııasy bastalǵaly beri Ońtústik Koreıada alǵash ret bir kúnde osynsha kóp naýqas tirkelip otyr dep habarlaıdy "Adyrna" ulttyq portaly centralasian.org-ke silteme jasap.
Osydan bir kún buryn elde 950 adamnyń test qorytyndysy olarǵa vırýs juqqanyn kórsetken edi. Biraq jeksenbidegi kórsetkish budan da asyp ketip otyr. 12 jeltoqsanda Ońtústik Koreıa prezıdenti Mýn Chje In jaǵdaıdyń óte aýyr ekenin aıtyp, koronavırýs pandemııasynyń ekinshi tolqynyn aýyzdyqtaýǵa bıliktiń qaýqarsyz bolyp otyrǵany úshin elden keshirim surady.
Vırýs juqtyrǵan naýqastardyń basym kópshiligi Seýldegi aýdannan anyqtalyp jatyr dep habarlaıdy reseılik "Interfaks". Elde qatań shekteý sharasy engizilgenimen indet boı bermeı, jaǵdaı kúrdeli bolyp tur. Koronvırýs qaýpine baılanysty 50 adamnan kóp kisi qatysatyn shara ótkizýge tyıym salynǵan, sport jarystary kórermensiz ótedi. Dámhanalar tapsyrys boıynsha tamaqty úıge jetkizip berýge kóshken, restorandar saǵat 21:00-de jabylady.
Bılik budan da qatań shekteý sharalaryn engizýge májbúr bolýy múmkin ekenin aıtady. Mysaly, mektepterdi jaýyp, qatysýshy sany 10 adamnan aspaıtyn sharaǵa, sol sııaqty, jumysyn qashyqtan isteýge kelmeıtin eń mańyzdy qyzmetkerlerge ǵana jumys ornyna barýyna ruqsat berilýi múmkin.
Ońtústik Koreıada pandemııa bastalǵaly beri 42,7 myń kisige koronavırýs juqqan, 580 adam qaıtys bolǵan.
