Kúni keshe «Alash Ulttyq Avtonomııalyq Respýblıkasyna – 103jyl!» tolýyna oraı dástúrli «Alash álemi» ıntellektýaldy saıysy onlaın formatta ótti, dep habarlaıdy «Adyrna» ulttyq portaly.
Onlaın baılanysqa Ahmet Baıtursynuly murajaı-úıinen saıys júrgizýshileri Raqymjan Qaldykóz ben Baljan Aqylbek baılanysqa shyqty. Saıys ataýly úsh bólimnen turady: «Soǵaıyn sózimnen bir altyn saraı» mánerlep jatqa oqý, «Ishi altyn, syrty kúmis sóz qaldyrǵan» esse jazý jáne «103 suraq-jaýap» jarysy. Atalǵan saıystardyń mánerlep óleń oqý men esse jazý bólimi qatysýshylardan aldyn ala alynyp áleýmettik jelige jarııalandy. Keshe «103 suraq-jaýap» jarysy ótip, artynsha ádilqazy alqalary barlyq qatysýshylardy júldeli oryndarymen marapattady.
Saıysqa respýblıkamyzdyń onnan asa qalalarynan, ár túrli mamandyqta bilim alyp jatqan jalpy jıyrma úsh stýdent qatysty. Ádilqazy alqalary: belgili alashtanýshy Svetlana Smaǵulova, ahmettanýshy Raıhan Sahybekqyzy, pedagogıka ǵylymdarynyń doktory Bereke Dáýlethanqyzy, Alash arysy Qoshke Kemeńgerdiń urpaǵy, alashtanýshy Qaıyrbek Kemeńger. Tájirıbeli mamandar saıys jeńimpazdaryn qyzý talqyǵa salyp, barynsha ádil baǵalaýǵa tyrysty. Ádil ótýiniń ereksheligi de osy, stýdentterdiń jumystaryna jeke-jeke baǵalaý krıterııi arqyly keri baılanys jasap, stýdentterge durys baǵyt baǵdar kórsetýinde. Endeshe bıyl tórtinshi ret jalǵasyn taýyp otyrǵan saıystyń júldegerlerimen tanys bolyńyzdar!
I. «Soǵaıyn sózimnen bir altyn saraı» jatqa mánerlep oqý bólimi boıynsha:
Bas júlde ıegeri Tóleýbek Arýjan, I oryn Qulshar Bekzat, II oryn Ysqaqov Qýanysh pen Jeńisbek Aıjan, III oryn Gúlnar Taıjan men Tasybek Dana, ataýly nomınaııalarmen Sársen Raýan Nurbolatuly, Beketaeva Araı, Almat Álıhanuly, Ǵabdýl-Ahmet Saıdǵalı, Abdýrahmanova Nozlı Hamdamqyzy, Qyryqbaı Saıan marapattaldy.
II. «Ishi altyn, syrty kúmis sóz qaldyrǵan» esse jazý bólimi boıynsha:
Ádilqazy alqalarynyń ortaq sheshimimen bas júldege laıyq esse tabylmady. I oryn ıegeri Qamshybek Ahmet Qanatuly, II oryn Aqbergen Juldyz ben Qyryqbaı Saıan, III oryn Nyshan Aıdana, arnaýly nomınaııalarmen Indıra Sultanǵalıqyzy, Gúlmıra Qýanyshqyzy, Myrzaqan Quralaı marapattaldy.
III. «103 suraq-jaýap» bólimi boıynsha:
Bas júlde ıegeri Aıdarkýlova Gúlmıra, I oryn Qamshybek Ahmet Qanatuly, II oryn Nyshan Aıdana men Saýtbekova Bópejan, III oryn Turlybaı Aısha, Tóleýbek Arýjan jáne Halmýradova Gúlshat, nomınaııamen Ysqaqov Qýanysh marapattaldy.
Stýdentterdiń daıyndyǵy ásirese «103 suraq-jaýap» jarysyna jyldaǵydan jaqsy daıyndyq júrgeni baıqalatynyn, suraqtardy budan da kúrdelendirýge ádilqazy alqalary tikeleı qadaǵalaıtynyn jyldyq josparǵa aldy. Ádilqazy alqalary bas júldegerlerge yntalandyrý maqsatynda óz attarynan avtorlyq kitaptary men bir rettik shákirtaqy taǵaıyndady. Uıymdastyrýshy tarapynan qalǵan birinshi, ekinshi oryn ıelerine de qundy kitaptar men qarjylaı syılyq tartý etti. Saıys nátıjesinde stýdentter onlaın bolsa da, ortaq mámilege kelip, bir úıdiń balasyndaı jyly orta qalyptastyrdy. Qaıraty men bilimi úılesken jastardyń júregine myna zamanda ádilettiń otyn jaǵý bizge mindet. Basy jıylyp turǵan jastardyń tanymyn, bilimin arttyratyn onlaın júzdesýlerdi jalǵastyryp otyrýdy maqsat etti.
Qoryta kele, Ult ustazy Ahmet Baıtursynulynyń: «…Basqadan kem bolmas úshin biz bilimdi, baı hám kúshti bolýymyz kerek. Bilimdi bolýǵa oqý kerek. Baı bolýǵa kásip kerek. Kúshti bolýǵa birlik kerek. Osy kerekterdiń jolynda jumys isteý kerek» degen amanat sózine qarata saıysty jobanyń maqsaty da osy úsh kerekke negizdeledi. Qatysyp, bilim baılyǵyn jınaǵan jastarǵa, Alash ıdeıasy astynda birigip, jol kórsetip jatqan ustazdarymyzǵa alǵysymyz sheksiz. «Qarańǵy qazaq kógine órmelep shyǵyp kún bolam…»
Daıyndaǵan: joba avtory men uıymdastyrýshysy – Baljan Aqylbek
