Kesheli beri Qazaq sport jáne týrızm akademııasynyń prezıdenti Qaırat Zakırıanovtyń kabınetindegi ań-qustardyń terisi men tulyby týraly alyp-qashpa áńgime órship tur.Bul aıqaı-shýdyń artynda destrýktıvti dinı aǵymdardyń turǵanyna esh kúmánim joq.
Belgili ónertanýshy Erlan Tóleýtaı aǵamyzdyń "ózbektiń boksynda din joq, rýh bar. Qazaqtyń sportynda din bar, rýh joq. Sport salasyn salafızm ıdeologııasynan tazalamaı, kósegemiz kógermeıdi" degen sózimen kelisemin.
Ásirese, kúres, boks, ulttyq oıyndar taǵy basqa sport túrleri ýahabıtterdiń qolynda. Olar qazaq sportyn rýhynan aıyrýda.
Túbegeıli sharalar qoldanbasa, qazaq sportynyń bolashaǵy bulyńǵyr degen Erlan aǵamyzdyń janaıqaıyna tolyqtaı qosylamyn. Týrızm jáne sport akademııasynyń prezıdenti, fızıka-matematıka ǵylymdarynyń kandıdaty, pedagogıka ǵylymynyń doktory Qaırat Zakırıanovqa qarsy sáláfılerdiń tarapynan aqparattyq shabýyl nege dál qazir bastalyp otyr?
Qazaq dalasyndaǵy ańshylyq dástúrler erte zamandarda qalyptasyp, kóshpendiler turmysynda bekem ornyqqan. Tulpardy tizgindep, tazysyn ertken, búrkitti qolyna qondyrǵan keshegi ańshy-saıatshy kóshpendiler de, zamanaýı qarý asynǵan, kúrdeli taý ańshylyǵyna shyqqan búginginiń mergenderi de, qazaqstandyqtar úshin - naǵyz erlik pen tózimdiliktiń úlgisi sanalady. Ata-babamyzdan qalǵan sol ańshylyq dástúrdi jańǵyrtyp júrgen Qaırat aǵamyzdyń "20 jylda kóptegen adam kabınetimde osy ańdardyń terisimen sýretke tústi. Uzaq jyldan beri turǵan terilerdiń nege búgin qoǵam nazaryn aýdarǵanyna tańym bar?" degen oryndy suraǵyna ne dep jaýap berýge bolady?
Birinshiden, Qaırat Qaırýllınuly tegi túrki babamyz Shyńǵyshan týraly talaı ǵylymı baǵytta tarıhı eńbekter (monografııa, kitaptar) jazǵan adam. Al dinshilder bolsa, Shyńǵyshan babamyzdy "musylmandardy"jappaı joıyp-qyrǵan adam retinde jek kóredi.
Ekinshiden, professor aǵamyz sport salasyndaǵy destrýktıvti dinı ıdeologııaǵa ýlanǵan sportshylarǵa baılanysty ártúrli dóńgelek ústelder men minberlerde dinı fanatızmniń zardaby týraly ashyq aıtyp júrgen, birden bir joǵary oqý ornynyń basshysy.
Qoǵamda kezdeısoq eshnárse bolmaıtyny túsinikti, sol úshin Qaırat aǵamyzǵa sáláfılerdiń osyndaı ospadar áreketine qaımyqpaı, jastardyń teris aǵymdardyń jeteginde ketpeýine atsalysyp, Qazaq eline qyzmet jasaı berýine tilektespin.
Turarbek QUSAIYNOV,
"Demos" QB tóraǵasy
