Qazaqstan Prezidentı Bas prokuraturanyŋ basşylyq qūramymen keŋes ötkızdı, dep habarlaidy «Adyrna» tılşısı Aqordaǧa sılteme jasap.
Jiyn barysynda memleket basşysy qūqyq qorǧau qūrylymdarynyŋ ıs-qimyldaryn üilestırudı jolǧa qoiudy tapsyrdy.
– Ökılettılıkterdı bır-bırınen alu, ärkımnıŋ körpenı özıne tartuy – ülken qatelık. Eşkımnıŋ öz qūzyretınen airylǧysy kelmeitını tüsınıktı. Bıraq mäselenıŋ törkınınde jeke ambisiialar men mekemenıŋ müddelerı emes, barşa qoǧam men memlekettıŋ müddesı tūruy tiıs. Osyǧan bailanysty Üilestıru keŋesınıŋ qyzmetın qaita jasaqtau qajet. Onyŋ mındetı ışkı ıster organdaryndaǧy, qarjy monitoringı men sybailas jemqorlyqqa qarsy küres qyzmetındegı reformalardy üilestıru, barlyq qūqyq qorǧau jüiesınıŋ qyzmetın jaqsartudyŋ jaŋa täsılderın ızdestıru, – dedı Qasym-Jomart Toqaev.Sondai-aq ol prokuraturanyŋ zaŋ üstemdıgın qamtamasyz etude jäne qylmyspen küreste airyqşa röl atqaratynyn atap öttı. Memleket basşysy pandemiia kezınde elımızde qylmystyq ıs-äreketterdıŋ 30 paiyzǧa azaiǧanyn aityp, qūqyq qorǧau jüiesınıŋ jūmysyn oŋ baǧalady. Sonymen qatar Prezident halyqtyŋ senımı men azamattardyŋ bergen baǧasy basty ölşem ekenıne toqtalyp, osy saladaǧy reformalar qarqyndy jürgızıle beretının aitty.
– Aldaǧy reformalar kezınde prokuratura organdarynyŋ orny erekşe bolady. Bügınde qylmystyq prosestıŋ üş buyndy modelı engızılude. Sonyŋ arqasynda bır aidyŋ ışınde 692 adamdy qylmystyq qudalaudan araşalap qaldyq. Bıraq mūnymen şekteluge bolmaidy. Negızgı prosessualdyq şeşımderdıŋ barlyǧy prokurorlyq süzgıden ötuge tiıs. Būl – öte maŋyzdy mäsele. Bır de bır zaŋ būzu deregı prokuror nazarynan tys qalmauy qajet, – dedı ol.
«Adyrna» ūlttyq portaly
Ūqsas jaŋalyqtar
