Mınıstr málimdemesi: aqparat salasynda úlken jańalyq oryn aldy

2342
Adyrna.kz Telegram

QR Aqparat jáne qoǵamdyq damý mınıstri Aıda Balaeva «Egemen Qazaqstan» men «Kazahstanskaıa pravda» gazetteri biriktirilip, derbes «Egemen Qazaqstan» akıonerlik qoǵam retinde qurylǵany týraly jańalyqty bólisti. Bul týraly mınıstr Facebook jelisinde jazdy, dep habarlaıdy «Adyrna» ulttyq portaly.

«Búgin otandyq aqparat salasynda taǵy bir úlken jańalyq oryn alyp otyr. Elimizdiń eń basty basylymdary – «Egemen Qazaqstan» men «Kazahstanskaıa pravda» gazetteri biriktirilip, derbes «Egemen Qazaqstan» akıonerlik qoǵam retinde quryldy. Onyń Basqarma tóraǵasy laýazymyna – elimizge belgili zııaly azamat Darhan Qýandyquly Qydyrálini taǵaıyndadym», – dep jazdy Balaeva.

Mınıstr qos gazettiń biriktirilýin otandyq medıanyń damý baǵytyndaǵy kezekti mańyzdy qadam dep sanaıtyndyǵyn da aıtyp ótti.

«Ótken ǵasyrdyń basynda bir-birine qanattasa, birinen soń bir jaryq kórgen júz jyldyq jylnamasy bar qos gazet – halyqqa aqpar jetkizýde ózderine júktelgen mindetti abyroımen atqara bildi. Dese de, búgingideı aqparattyq tehnologııa qaryshtap damyǵan ınternet dáýirinde dástúrli baspasózdi zaman kóshine saı jańǵyrtyp otyrý – ýaqyt talaby. Sondyqtan Úkimettiń Qaýlysymen qabyldanǵan bul ózgeris otandyq medıanyń damý baǵytyndaǵy kezekti mańyzdy qadam dep sanaımyn», – dedi ol.

Sonymen qatar mınıstr eki gazetti biriktirý – onyń bireýi óz jumysyn toqtatady degendi bildirmeıtindigin tilge tıek etti. «Kazahstankaıa pravda» gazeti óziniń qalyptasqan brendtik ataýyn saqtaıtyn bolady. Sondaı-aq basylymdy memlekettik aqparat tapsyrysy aıasynda qarjylyq qoldaý jalǵasa bermek. Eń bastysy bul jýrnalısterdiń shyǵarmashylyǵyna eshqandaı kedergisin keltirmeıdi eken.

«Qaıta bir ortalyqqa birikken qos basylymnyń eldi aqparattyq-ıdeologııalyq turǵydan qamtý aıasy birizdenip, oqyrman aldyndaǵy tartymdylyǵy men sapaly kontent usyný áleýeti odan ary artady dep oılaımyn. Biriktirý barysynda tek ákimshilik-sharýashylyq resýrstar qysqarady. Birinshi kezekte árıne qarjy únemdeledi. Bul óz kezeginde, shyǵarmashylyq ujymnyń tabysyn arttyryp, sapalyq quramyn kúsheıtýge tyń múmkindik bolmaq. Eń bastysy, respýblıkalyq bas basylymdardyń mazmun-kontenti jańa sapaǵa kóterilip, básekege qabileti kúsheıe túsedi dep sanaımyn», - dep jazdy mınıstr.

"Adyrna" ulttyq portaly

Pikirler