Qostanaıda aldaǵy eki jylda isten shyqqan aýyl sharýashylyǵy tehnıkasyn qaıta óńdeý habyn salý josparlanýda. Óndiris ındýstrııalyq aımaqtyń aýmaǵynda ornalasady. Jaqyn arada joba daıyndalyp, osy maýsymda qurylys-montajdaý jumystaryna kirisý josparlanýda.
Kásipkerlik jáne ındýstrııalyq-ınnovaııalyq damý basqarmasynyń basshysy Oljas Saparbekov atap ótkendeı, bul joba aýyl sharýashylyǵy mashınasyn jasaýdy belsendi damytýǵa múmkindik beredi. Hab salý - aǵymdaǵy jyly iske asyrylatyn alty jobanyń biri. Tizimde sondaı-aq Qarabalyq aýdanyndaǵy broıler qus fabrıkasy (burynǵy Komsomolskaıa), Arqalyqtaǵy elevator men qurama jem zaýytynyń qurylysy bar. Qazirdiń ózinde "KIA" markaly avtomobılderdi shyǵarý jelisi jumys isteýde, avtokomponentterdi óndirý boıynsha oqshaýlaý ortalyǵy iske qosyldy.
Indýstrııalandyrý memlekettik baǵdarlamasy aıasynda óńirde jalpy somasy 180 mıllıard teńge bolatyn 98 joba júzege asyryldy. Bul alty myń adamdy jumysqa ornalastyrýǵa múmkindik berdi. Tek 2020 jyldyń ózinde quny 11 mıllıard teńge bolatyn bes joba iske qosylyp, 400 jumys orny ashyldy. Olardyń qatarynda "qarapaıym zattar ekonomıkasy" baǵyty aıasynda iske qosylǵan "Mıbeko" JShS suly qaýyzyn óndirý jelisi bar.
