Biz táýelsizdikke ańsap, zaryǵyp jettik. Kózdi ashyp – jumǵansha egemendi el bolǵanymyzǵa orda buzar 30 jyl ótipti. Bıyl Táýelsizdigimizdiń otyz jyldyǵyn toılaımyz. Memleket basshymyz aıtqandaı «Endi sol táýelsizdiktiń qasıetti rámizderin de erekshe qadirleýimiz, qasterleýimiz kerek. Árbir azamat Qazaqstannyń Týyn, Eltańbasyn, Ánuranyn tumardaı qasıet tutýy qajet. Eldigimizdiń synalatyn bir tusy – osy», memlekettik rámizder – el damýynyń ajyramas bóligi. Sondyqtan qazaqstandyqtardyń osy rámizderge degen qurmeti, olardy boıtumardaı qasterleýi erekshe sezilip turýy tıis.
Rámizder arqyly elimizdi búkil álem tanıdy. Óıtkeni onda qazaq halqynyń bastan ótkizgen tarıhy, mádenıeti men dástúri kórinis beredi. Jastardyń otansúıgishtik sezimin oıatady, patrıotızmge úndeıdi, batyldyqqa tárbıeleıdi. Tipti balabaqsha búldirshinderi oń qolynyń alaqanyn júrek tusyna qoıyp, «Meniń Qazaqstanymdy» shyrqaǵanda erekshe bir sezimge bólenetiniń, jigerlenip qanattanatynyń ras. Bul el bolashaǵy – jastardyń óz Otanyn, óz jerin, óz elin qorǵaýǵa degen sezimin oıatyp, senimin nyǵaıtatyny anyq.
4 maýsym – elimizdiń memlekettik rámizderi kúni. 1992 jyldyń 4 maýsymynda Qazaqstan Respýblıkasynyń Tuńǵysh Prezıdenti Nursultan Nazarbaev qol qoıǵan zańdarmen tuńǵysh ret táýelsiz elimizdiń Týy, Eltańbasy bekitildi, al 1992 jyldyń 11 jeltoqsanynda Memlekettik Ánuranymyz týraly zańǵa qol qoıyldy. Mine, egemendigimizdiń belgisi retinde bekitilgen Tý, Eltańba jáne Ánuran -ultymyz úshin asa qasterli qundylyqtar. Memlekettik rámizder barsha qazaqstandyqtyń rýhyn asqaqtatyp, ulttyq bitim – bolmysyn aıshyqtaıdy. Otyz jyl bıikte jelbiregen kók týymyz máńgilik eldiń mártebesin kótere bersin. «Talasqa tússe jan men tý – jan emes maǵan keregi. Kók týdyń jelbiregeni»,-dep ándetken keleshegimizdiń bolashaǵy jarqyn bolsyn.
Ardaq Qumarova
