Jurt ishinde saraı aqyny degen atpen tanymal aqyn Baltabek Nurǵalıev halyqtan keshirim surap, óz feısbýk paraqshasynda jazba qaldyrdy. Bul týraly "Adyrna" ulttyq portaly habarlaıdy.
Esterińizge sala keteıik, osydan birer jyl buryn Baltabek Nurǵalıev esimdi atyshýly aqyn ózin qazaqtyń uly aqyny ári oıshyly Abaı Qunanbaıulynan da bıik sanaıtynyn aıtyp, «Másele» baǵdarlamasynda aǵynan jarylǵan edi.
- Búkil qazaq meni oqyp júr. Orystildi bolsyn, qazaqtildi bolsyn jáne basqa tildegi aqyndardyń ishindegi, qazaqstandyq poezııadaǵy eń kóp oqylatyn aqyn, ol – menmin. Eshkim basqa aqyndardy úıinde tyǵylyp, jastanyp, ár árpimdi, ár býynymdy sanap, meni oqyǵandaı oqymaıdy. Qazaq poezııasynda nómiri birinshi bolyp men turmyn dep esepteımin. Men oǵan senimdimin, - dedi Baltabek aqyn.
Al, júrgizýshiniń «Abaıdyń aldyna shyǵyp ketken joqsyz ba?» degen kelesi suraǵyna:
- Oqylym jaǵynan Abaıdyń da aldyna shyǵyp kettim dep esepteımin, - degen edi esh shimirikpesten Baltabek aqyn.
Arada eki jylǵa jýyq ýaqyt ótken soń Baltabek aqyn «bıginen» túsip, qateligi úshin halyqtan keshirim surady.
- Qurmetti qazaqstandyqtar, izgi baýyrlar! Men búgin Abaıdyń menen de kóp oqylatyn aqyn ekenine kózim jetti. Moıyndadym. Jalǵyz Abaı ǵana emes, jalpy qazaq ádebıetindegi barlyq aqyndar menen kóp oqylady. Men álemdegi eń sońǵy aqynmyn. Qazaqstandyq poezııadaǵy, orys tildi bolsyn, qazaq tildi bolsyn, jalpy basqa tilderdegi aqyndardyń ishindegi eń az oqylatyn aqyn, ol – menmin. Qazaq poezııasynda az oqylý jaǵynan nómiri birinshi bolyp men turmyn dep esepteımin. Abaıdyń óleńi de, de ózi de menen alda. Men oqylym jaǵynan da, basqa ulylyq jaǵynan da, jańashyldyq jaǵynan da Abaıdyń aldyna shyǵyp ketken joqpyn. Qateligim úshin qoǵamnan keshirim suraımyn, - dep aǵynan jaryldy.
Saraı aqyny atanyp ketken Baltabek aqynnyń bul jazbasyna jazylyp jatqan pikirler de kóp eken.
"Adyrna" ulttyq portaly
