Sońǵy kezde kópshilik "Kalmar oıyny" serıaly týraly kóptegen pikir aıtýda. Al serıal kórgen balalar kınodaǵy epızodtardy qaıtalaýda. Álem ustazdary osylaı dep dabyl qaǵýda. Balalar oıyn oınap, jeńilgenderdi kemsitip, qorlap, tipti soqqyǵa jyǵyp, qatigez jazalaýda dep habarlaıdy "Adyrna" ulttyq portaly "nege.kz-ke" silteme jasap.
Al qııaly qatty damyǵan balalar senarııden shyǵyp, kınodaǵydan da qaýipti jazalardy oılap tabýda. Psıholog ári psıhoterapevt Galına Saltanovanyń aıtýynsha, bul oıyndy toqtatpasa, onyń sońy orny tolmas ókinishke aparýy múmkin.
"Balalardyń psıhıkasy tolyq qalyptasyp bitpegen. Olar obrazdy túrde, kóz aldyna kartınany elestetip oılanady. Al ol oılary aldymen sanasyna, keıin beısanasyna jazylady", - deıdi psıholog.
G.Saltanovanyń pikirinshe, "Kalmar oıyny" balalar úshin qaýipti. Bul oıyn álsiz adamnyń kózin joıýǵa jeteleıdi.
"Oıyn - balalyq kezeńniń jetekshi qyzmeti. Oıyn oınaý arqyly biz rólderdi tanyp-bilemiz. Buryn balalar anasy men qyzy, dúkenshi, qutqarýshy, polıeı syndy oıyndardy oınaıtyn. Endi balalar qaskóıdi somdaıdy. Bul qoǵam úshin qaýipti", - deıdi Galına Saltanova.
Psıhologtyń aıtýynsha, elimizde "Kalmar oıynyna" tez arada shekteý qoıý kerek.
"Kalmar oıyny" óte qaýipti. Belgisiz adamdardyń mektepke basyp kirip, oqýshylardy atyp tastaǵanyn hıkaıalardan bilemiz. Ata-analar balanyń teledıdardan, ǵalamtordan qandaı kontent qarap otyrǵanyn qatań baqylaýy kerek", - deıdi psıholog.
Bul oıyndy oınaǵan balanyń psıhıkasyna sińip, bolashaqta ol syrtqa shyǵyp, adam shoshyrlyq jaıttarǵa aparýy múmkin. "Júıke-júıesi álsiz qabyldaǵysh balalar álsiz bolýdan qorqatyn bolady", - dedi G.Saltanova.
Aıta keteıik, "Kalmar oıyny" — jaqynda ǵana el arasynda keńinen tanymal bolǵan Netflix-tegi serıal. Hıkaıada qaryzǵa batqan adamdar birtúrli oıynǵa qatysýǵa kelisedi. Jeńimpaz qomaqty qarjyǵa ıe bolsa, jeńilgender óledi. Serıal álemniń 90 elinde eń kóp qaralǵan 10 týyndynyń ishinde kósh bastady.
"Adyrna" ulttyq portaly.
