Qyrǵyzstannyń ulttyq qaýipsizdik memlekettik komıteti ishki ister mınıstrligimen birlesip, el aýmaǵynda bılikti kúshpen basyp almaq bolǵandardyń joly kesti, dep habarlaıdy Sputnik Qyrǵyzstan.
Bılikti basyp alý úshin jaǵdaıdy turaqsyzdandyrýdy josparlaǵan topty Qyrǵyzstan IIM qyzmetkerleri parlament saılaýy aldyndaǵy qaýipsizdikti qamtamasyz etý jumystary barysynda anyqtaǵan.
"Saılaý óte sala eldegi qoǵamdyq-saıası jaǵdaıdy turaqsyzdandyryp, arandatý arqyly ary qaraı bılikti kúshtep basyp alýdy josparlaǵan bir top tulǵa jaıly derekter anyqtaldy", - delingen Qyrǵyzstan Ulttyq qaýipsizdik memlekettik komıteti baspasóz qyzmetiniń habarlamasynda.
Atalǵan top Jogorký Kenesh depýtattary men ózge de destrýktıvti kózqarastaǵy sheneýnikterdiń basqarýymen áreket etken.
"Atalǵan top ótkeli otyrǵan parlament saılaýynyń nátıjeleri jarııalanǵan soń jekelegen saıası kúshterdiń, onyń ishinde saılaýda jeńilgenderdiń qoldaýyna ıek artyp, Bishkek aýmaǵynda jappaı qarsylyq sharalaryn uıymdastyryp, ary qaraı bılikti basyp alýdy kózdegen", - deıdi vedomstvonyń baspasóz qyzmeti.
Basylymnyń habarlaýynsha, top quramyna agressıvti kózqarastaǵy jastardy jınap alǵan. Olar artynsha qarsylyq uıymdastyrýǵa tıis bolǵan.
Quqyq qorǵaý organdary belsendi qatysýshylardyń turǵylyqty jeri men keńselerine tintý jumystaryn júrgizip, olardyń qylmysqa qatysýǵa daıyndalǵanyn dáleldeıtin qujattar, qarý-jaraq, oq-dári men esirtki zattaryn tapqan.
Nátıjesinde qylmystyq toptyń 5 múshesi ustalyp, qylmystyq jaýapkershilikke tartylǵan. Atalǵan qylmystyq is boıynsha tergeý amaldary jalǵasyp jatyr.
"Adyrna" ulttyq portaly
