Мемлекет басшысы Қасым-Жомарт Тоқаев Қазақстан халқына үндеу жолдап, оларды Халықаралық волонтерлар күнімен құттықтады, - деп хабарлайды «Адырна» ұлттық порталы.
«Бүгін, Халықаралық волонтерлар күнінде біз басқаларға жанқиярлықпен көмектескендерді құрметтейміз. Біздің волонтерлар мейірімділік пен қайырымдылық, ынтымақ пен азаматтық жауапкершіліктің жоғары идеалдарын бейнелейді. Бұл іргелі құндылықтар «Адал Азамат» тұжырымдамасының негізінде жатыр. Әлеуметтік маңызы бар іс-шараларға қатысып, қайырымдылық жобаларын жүзеге асырып, мұқтаж жандарға қамқорлық жасап жүргендердің барлығына алғыс айтамын. Шығармашылық іс-әрекеттеріңізде шынайы патриотизм көрінеді. Мемлекет елдегі еріктілер қозғалысына қолдау көрсетуді жалғастырады», - деп жазды Президент өзінің X (Twitter) парақшасында.
БҰҰ-ның ресми сайтында Халықаралық еріктілер күнін БҰҰ Бас Ассамблеясы бекітті. Ол жыл сайын 5 желтоқсанда тойланады.
«Бұл күн еріктілер мен ұйымдар үшін өз жетістіктерін атап өтуге, идеялармен бөлісуге және жергілікті қауымдастықтар, үкіметтік емес ұйымдар (ҮЕҰ), БҰҰ агенттіктері, мемлекеттік органдар және жеке сектор арасында өз жұмысын ілгерілетуге көмектесетін бірегей мүмкіндік», - дейді БҰҰ.
Біріккен Ұлттар Ұйымының мәліметі бойынша, 15 және одан да жоғары жастағы еріктілердің ай сайынғы саны әлем бойынша 862,4 миллион адамды құрайды. Волонтерлік жобалардың көпшілігі бейресми түрде ұйымдастырылған — оларға әлем халқының 14,3 пайызы қатысады, ал еңбекке қабілетті жастағы адамдардың 6,5 пайызы ұйымдар немесе қауымдастықтар арқылы ресми волонтерлік қызметке қатысады.
Ресми еріктілер арасында ер адамдар басым болса, бейресми волонтерлер арасында әйелдер жиі кездеседі. Qazvolunteer.kz платформасындағы ақпаратқа сәйкес, Қазақстанда ұлттық волонтерлік желі 2010 жылы құрылған. Бұл азаматтардың, азаматтық қоғам институттарының, кәсіпкерлік сектордың және мемлекеттік органдардың арасында волонтерлік қызмет мәдениетін, волонтерлік бастамалар мен қызметті қалыптастыру, қолдау және дамыту мақсатында азаматтар мен заңды тұлғалардың ерікті бірлестігі.
«Адырна» ұлттық порталы
