12 ءساۋىر قازاقستاندا عىلىمي قىزمەتكەرلەر كۇنى. اتاۋلى كۇنمەن قر پرەزيدەنتىنىڭ اكىمشىلىگى باسشىسىنىڭ ورىنباسارى ايدا عالىمقىزى قۇتتىقتادى، دەپ حابارلايدى "ادىرنا" ۇلتتىق پورتالى.
"بۇگىن ەلىمىزدە عىلىمي قىزمەتكەرلەر كۇنى! ءىلىم جيناپ، ءبىلىم يگەرىپ، عىلىمنىڭ العا وزۋىنا قىزمەت ەتىپ جۇرگەن عالىمدار قاۋىمىن كاسىبي مەرەكەسىمەن شىن جۇرەكتەن قۇتتىقتايمىن! عىلىم مەيرامىنىڭ وسى كۇنگە بەلگىلەنۋىنىڭ دە وزىندىك ءمانى بار. بۇگىن قازاق عىلىمىنىڭ قارىشتاپ دامۋىنا ولشەۋسىز ۇلەس قوسقان ۇلت ماقتانىشى – قانىش يمانتايۇلى ساتپاەۆتىڭ دا تۋعان كۇنى. قانىش يمانتايۇلىنىڭ ۇلتتىق عىلىم دەڭگەيىن قانداي بيىككە شىعارعانىن ۇرپاق ەشقاشان ۇمىتپايدى!ءسوز جوق، دامۋ دەڭگەيىمىزدىڭ بۇگىنگى قول جەتكىزگەن جەتىستىگىنىڭ بارلىعى عىلىمنىڭ يگىلىگى. سوندىقتان عىلىمنىڭ نەگىزگى قوزعاۋشى كۇش ەكەنىن تۇسىنگەن ەلدەر بۇل سالاعا ايرىقشا كوڭىل بولەدى. ءبىزدىڭ ەلىمىز وسى جولدى تاڭداعان مەملەكەتتەر قاتارىندا جانە تاۋەلسىزدىك العاننان بەرى ۇلتتىق عىلىمعا جۇيەلى تۇردە قولداۋ كورسەتىپ كەلەدى. وتاندىق عىلىمدى مەملەكەتتىك دەڭگەيدە قولداۋ – پرەزيدەنتىمىز قولعا العان رەفورمالار توپتاماسىندا نەگىزگى باسىمدىققا يە. اسىرەسە، ەكونوميكانى ءارتاراپتاندىرۋ مىندەتىن ىسكە اسىرۋدا عىلىمي تۇجىرىمدارعا باسا ءمان بەرىلەدى.بۇگىن سونداي-اق «عارىشكەرلەر كۇنى!» ادامزات بالاسىنىڭ كوسموسقا جاساعان العاشقتى قادامى قازاق جەرىنەن، بايقوڭىر ايلاعىنان باستالعانى ءبىز ءۇشىن قاشاندا زور ماقتانىش! جالپى عارىشتى زەرتتەۋ جانە تەرەڭ يگەرۋ سالاسى – بولاشاق عىلىمنىڭ باستى نىسانى بولاتىنى ءسوزسىز.ەلىمىزدىڭ عالىمدارىنا عىلىمي ىزدەنىستە تابىستى ناتيجەلەرگە قول جەتكىزىپ، جەمىستى دە جەڭىستى شىڭداردى باعىندىرا بەرۋدى تىلەيمىن!" دەپ جازدى ايدا عالىمقىزى ءوزىنىڭ Facebook پاراقشاسىندا.
