12 sáýir Qazaqstanda ǵylymı qyzmetkerler kúni. Ataýly kúnmen QR Prezıdentiniń Ákimshiligi Basshysynyń orynbasary Aıda Ǵalymqyzy quttyqtady, dep habarlaıdy "Adyrna" ulttyq portaly.
"Búgin elimizde ǵylymı qyzmetkerler kúni! Ilim jınap, bilim ıgerip, ǵylymnyń alǵa ozýyna qyzmet etip júrgen ǵalymdar qaýymyn kásibı merekesimen shyn júrekten quttyqtaımyn! Ǵylym meıramynyń osy kúnge belgilenýiniń de ózindik máni bar. Búgin qazaq ǵylymynyń qaryshtap damýyna ólsheýsiz úles qosqan ult maqtanyshy – Qanysh Imantaıuly Sátpaevtyń da týǵan kúni. Qanysh Imantaıulynyń ulttyq ǵylym deńgeıin qandaı bıikke shyǵarǵanyn urpaq eshqashan umytpaıdy!Sóz joq, damý deńgeıimizdiń búgingi qol jetkizgen jetistiginiń barlyǵy ǵylymnyń ıgiligi. Sondyqtan ǵylymnyń negizgi qozǵaýshy kúsh ekenin túsingen elder bul salaǵa aıryqsha kóńil bóledi. Bizdiń elimiz osy joldy tańdaǵan memleketter qatarynda jáne táýelsizdik alǵannan beri ulttyq ǵylymǵa júıeli túrde qoldaý kórsetip keledi. Otandyq ǵylymdy memlekettik deńgeıde qoldaý – Prezıdentimiz qolǵa alǵan reformalar toptamasynda negizgi basymdyqqa ıe. Ásirese, ekonomıkany ártaraptandyrý mindetin iske asyrýda ǵylymı tujyrymdarǵa basa mán beriledi.Búgin sondaı-aq «Ǵaryshkerler kúni!» Adamzat balasynyń kosmosqa jasaǵan alǵashqty qadamy qazaq jerinen, Baıqońyr aılaǵynan bastalǵany biz úshin qashanda zor maqtanysh! Jalpy ǵaryshty zertteý jáne tereń ıgerý salasy – bolashaq ǵylymnyń basty nysany bolatyny sózsiz.Elimizdiń ǵalymdaryna ǵylymı izdeniste tabysty nátıjelerge qol jetkizip, jemisti de jeńisti shyńdardy baǵyndyra berýdi tileımin!" dep jazdy Aıda Ǵalymqyzy óziniń Facebook paraqshasynda.
