قازاقستان پرەمەر-ءمينيسترىنىڭ ورىنباسارى، قارجى ءمينيسترى ەرۇلان جاماۋباەۆ الماتى وبلىسىنا قاراستى بالقاش اۋدانىنىڭ تۇرعىندارىمەن كەزدەسۋ وتكىزدى. بۇل تۋرالى ۆەدومستۆونىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
كەزدەسۋدە الماتى وبلىسىنىڭ اكىمى مارات سۇلتانعازيەۆ پەن بالقاش اۋدانىنىڭ اكىمى عالىم توقپەيىسوۆ ەسەپ بەردى.
كۇن تارتىبىندە جاڭا جۇمىس ورىندارىن قۇرۋ، كرەديت بەرۋ ارقىلى شاعىن جانە ورتا بيزنەس سۋبەكتىلەرىن مەملەكەتتىك قولداۋ شارالارى، سونداي-اق حالىقتىڭ تابىسىن ارتتىرۋ باعدارلاماسى ماسەلەلەرى قارالدى.
كەزدەسۋ بارىسىندا 2022 جىلدىڭ 6 ايىندا وڭدەۋ ونەركاسىبىنىڭ كولەمى 5,8%-كە، جالپى ىشكى ءونىم 3,4%-كە، قۇرىلىس 9,2%-كە، ساۋدا مەن كولىك سالالارى 6,2%-كە ۇلعايعانى ايتىلدى.
"وسىجىلى وڭىرلەردىڭ دامۋىنا رەسپۋبليكالىق بيۋدجەتتەن 5,5 تريلليون تەڭگە ءبولىندى. بۇل جالپى شىعىنداردىڭ 30%-ءىن قۇرايدى. قازىرگى ۋاقىتتا جەرگىلىكتى بيۋدجەتتەردىڭ كىرىس بازاسى نىعايتىلۋدا. بۇل رەتتە، شاعىن جانە ورتا بيزنەستەن تۇسەتىن كورپوراتيۆتىك تابىس سالىعىن جەرگىلىكتى دەڭگەيگە بەرۋ وڭ اسەر ەتەدى", – دەپ حابارلادى قارجى مينيسترلىگىنىڭ ءباسپاسوز قىزمەتى.
ۆەدومستۆو مالىمەتىنشە، "اۋىل – ەل بەسىگى" جوباسىن ىسكە اسىرۋعا 128 ميللياردتەڭگە ءبولىنىپ، ولار 580 اۋىلدا 1 100 جوبانى ىسكە اسىرۋعا باعىتتالدى.
سونداي-اق "ديپلوممەن اۋىلعا" باعدارلاماسىن ىسكە اسىرۋ شەڭبەرىندە 4,3 مىڭ مامانعا تۇرعىن ءۇي ساتىپ الۋ ءۇشىن بيۋدجەتتىك كرەديتتەر بەرۋگە 20 ميللياردتەڭگە ءبولىندى. وسى كەشەندى جوسپارلار شەڭبەرىندە 170 مىڭنان استام جۇمىس ورنى ەنگىزىلەدى دەپ جوسپارلانۋدا.
"مەملەكەت باسشىسىنىڭ "جاڭا قازاقستان" تۇجىرىمداماسى ادال باسەكەلەستىكتى كۇشەيتۋ، جەكە مەنشىكتى قورعاۋ، ەكونوميكانى مونوپوليادان ارىلتۋ ارقىلى ەلىمىزدىڭ جاڭا ەكونوميكالىق باعىتىن ىسكە اسىرۋعا باعىتتالعان. وسى شارالاردىڭ بارلىعى ساياسي تۇراقتىلىقتى، بيزنەستىڭ مۇددەلەرى مەن قۇقىقتارىن قورعاۋ جۇيەسىن ايتارلىقتاي نىعايتادى، بارلىق قازاقستاندىق ءۇشىن كەڭ ەكونوميكالىق مۇمكىندىكتەر تۋعىزادى", - دەپ اتاپ ءوتتى مينيستر.
كەزدەسۋ سوڭىندا ەرۇلان جۇماباەۆ الماتى وبلىسى تۇرعىندارىنىڭ سۇراقتارىنا جاۋاپ بەرىپ، ءباسپاسوز كونفەرەنتسياسىنا قاتىستى.
”ادىرنا” ۇلتتىق پورتالى
