تۇركىستاندا «ويلان، تاپ» ينتەللەكتۋالدىق ويىنى ءوتتى

قازاقستان رەسپۋبليكاسىنىڭ كونستيتۋتسياسىنىڭ 30 جىلدىق مەرەكەسى جانە «18 قازان – رۋحاني كەلىسىم كۇنىنە» وراي وبلىستىق ءدىن ىستەرى باسقارماسىنىڭ ۇيىمداستىرۋىمەن «ويلان، تاپ» ينتەللەكتۋالدى ويىنى ءوتتى. شارانىڭ باستى ماقساتى – جاستاردىڭ ءبىلىمىن شىڭداۋ، ۇلتتىق قۇندىلىقتارعا، تاريح پەن مادەنيەتكە دەگەن قىزىعۋشىلىعىن ارتتىرۋ، سونداي-اق ءوزارا سىيلاستىق پەن بىرلىكتى ناسيحاتتاۋ.

وبلىس اكىمىنىڭ ورىنباسارى ەرتاي التاەۆ شاراعا ارنايى قاتىسىپ، «رۋحاني كەلىسىم كۇنىمەن» قۇتتىقتاپ، جۇلدەگەرلەر مەن جەڭىمپازداردى ماراپاتتادى.

– ينتەللەكتۋالدى سايىس قاتىسۋشىلاردىڭ زياتكەرلىك الەۋەتىن ارتتىرىپ، شىعارماشىلىق ويلاۋ قابىلەتىن دامىتىپ قانا قويماي، ولاردىڭ وتانسۇيگىشتىك سەزىمىن، ۇجىمدىق رۋحىن ارتتىرادى. سونىمەن قاتار، قاتىسۋشىلار ءوزارا تاجىريبە الماسىپ، جاڭا سەرىكتەستىك جانە دوستىق بايلانىستار ورناتادى، – دەدى ەرتاي كەنجەبەكۇلى. 

سايىس ءۇش كەزەڭنەن تۇردى. سۇراقتار ەلىمىزدىڭ جانە تۇركىستان وبلىسىنىڭ تاريحى، ادەبيەت، ۇلتتىق سالت-داستۇرلەر، ءدىن سالاسىنداعى زاڭنامالار جانە سپورت تاقىرىپتارىن قامتىدى. قاتىسۋشىلاردىڭ ءبىلىمى مەن تاپقىرلىعىن كاسىبي ادىلقازىلار القاسى باعالادى. قازىلار القاسى قاتارىندا تەلوگيا جانە فيلوسوفيا عىلىمدارىنىڭ دوكتورى، پروفەسسور دوساي كەنجەتاي، بىلىكتى ءدىن قىزمەتكەرى ايدوس وسپانوۆ جانە وبلىستىق ءدىن ىستەرى باسقارماسىنىڭ باسشىسى رۇستەم سابىرجانۇلى بولدى.

تارتىسقا تولى وتكەن ينتەللەكتۋالدى سايىستىڭ جەڭىمپازى – 500 000 تەڭگەنى وتىرار اۋدانىنىڭ قۇراما كومانداسى جەڭىپ الدى. جۇلدەلى ءىى ورىندى سايرام اۋدانى (250 000 تەڭگە) جانە ء«دىن ماسەلەلەرىن زەرتتەۋ ورتالىعى» كمم كوماندالارى (250 000 تەڭگە) السا، ءۇشىنشى ورىن ورداباسى (150 000 تەڭگە) جانە تولەبي اۋداندارىنا (150 000 تەڭگە) بۇيىردى.

سونىمەن قاتار، بارلىق قاتىسۋشىلارعا ىنتالاندىرۋ سىيلىقتارى مەن العىس حاتتار تابىستالدى. قاتىسۋشى كوماندالار اراسىندا ۇلتتىق ناقىشتاعى كيىم ۇلگىلەرىمەن ەرەكشەلەنگەن جەتىساي، سارىاعاش، سوزاق اۋداندارىنىڭ جانە «بالابي قاري» قۇران جاتتاۋ ورتالىعىنىڭ قۇرامالارى كورەرمەن كوزايىمى نوميناتسياسىنا، قارجىلاي سىيلىقتارعا يە بولدى.

ايتا كەتسەك، ينتەلەكتۋالدى ويىنعا وبلىستىڭ بارلىق اۋدان، قالالارىنان ىشكى ساياسات بولىمدەرىنىڭ قىزمەتكەرلەرى، «رۋحانيات» ورتالىقتارىنىڭ وكىلدەرى، جاستار رەسۋرستىق ورتالىقتارىندا قىزمەت اتقاراتىن تەولوگ ماماندار، ءدىن قىزمەتكەرلەرى جانە مەدرەسە-كوللەدج ۇستازدارى قاتىستى.