الماتى پروكۋراتۋراسى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنە (قازۇپۋ) تيەسىلى بىرقاتار نىساندى مەملەكەت مەنشىگىنە قايتاردى. بۇل تۋرالى قۇقىق قورعاۋ ورگاندارى جۇرگىزگەن تەكسەرىس ناتيجەسىندە بەلگىلى بولدى، دەپ حابارلايدى "ادىرنا" ۇلتتىق پورتالى Tengrinews-كە سىلتەپ.
پروكۋراتۋرا مالىمەتىنشە، ۋنيۆەرسيتەت عيماراتتارىنىڭ ءبىر بولىگى كوپ جىل بۇرىن زاڭسىز جەكەشەلەندىرىلگەن. كەيىن بۇل نىساندار ۋنيۆەرسيتەتتىڭ وزىنە جالعا بەرىلىپ وتىرعانى انىقتالعان.
تەكسەرۋ بارىسىندا قازۇپۋ عيماراتىنىڭ 208 شارشى مەتردەن استام بولىگى زاڭسىز جەكەشەلەندىرىلگەنى بەلگىلى بولدى. سوت اتالعان مامىلەلەردى جارامسىز دەپ تانىدى.
داۋلى نىسانداردىڭ ءبىرى – قازىبەك بي كوشەسى، 30 مەكەنجايىنداعى №4 وقۋ-سپورت كورپۋسى. جالپى اۋماعى شامامەن 1400 شارشى مەتر بولاتىن عيمارات 2003 جىلى ۋنيۆەرسيتەتتىڭ سول كەزدەگى رەكتورى توقمۇحامەد سادىقوۆ پەن «فيرما زۋراب» جشس (قازىرگى «ST Advisory» جشس) اراسىندا جاسالعان كەلىسىم بويىنشا تومەن باعامەن – 5 ميلليون تەڭگەدەن استام سوماعا ساتىلعان.
قازىرگى باعالاۋ بويىنشا نىساننىڭ قۇنى شامامەن 135 ميلليون تەڭگەنى قۇرايدى. پروكۋراتۋرا دەرەگىنشە، عيماراتتى ساتۋ كەزىندە باعالاۋ جۇرگىزىلمەگەن، كونكۋرس ۇيىمداستىرىلماعان، شەشىم ۋاكىلەتتى ورگانمەن ەمەس، جەكە قابىلدانعان.
سونىمەن قاتار، عيمارات جەكەمەنشىككە وتكەننەن كەيىن ۋنيۆەرسيتەتتىڭ وزىنە جالعا بەرىلگەن. سونىڭ ناتيجەسىندە وقۋ ورنى جالداۋ اقىسى رەتىندە جەكە تۇلعالارعا شامامەن 79 ميلليون تەڭگە تولەگەن.
بۇدان بولەك، پروكۋراتۋرا قوناەۆ كوشەسىندەگى اۋماعى 208,8 شارشى مەتر بولاتىن پاۆيلوندى دا مەملەكەت مەنشىگىنە قايتاردى. بۇل نىسان بۇرىنعى رەكتورمەن بايلانىستى تۇلعالارعا تومەن باعامەن ساتىلىپ، كەيىن بىرنەشە رەت قايتا ساتىلىپ، سوڭىندا تۋىستارىنا سىيعا بەرىلگەن. قازىرگى تاڭدا بۇل پاۆيلوندا تاۋلىك بويى جۇمىس ىستەيتىن الكوگول ونىمدەرىن ساتاتىن ورىن ورنالاسقان.
