Almaty prokuraturasy Abai atyndaǧy Qazaq ūlttyq pedagogikalyq universitetıne (QazŪPU) tiesılı bırqatar nysandy memleket menşıgıne qaitardy. Būl turaly qūqyq qorǧau organdary jürgızgen tekserıs nätijesınde belgılı boldy, dep habarlaidy "Adyrna" ūlttyq portaly Tengrinews-ke sıltep.
Prokuratura mälımetınşe, universitet ǧimarattarynyŋ bır bölıgı köp jyl būryn zaŋsyz jekeşelendırılgen. Keiın būl nysandar universitettıŋ özıne jalǧa berılıp otyrǧany anyqtalǧan.
Tekseru barysynda QazŪPU ǧimaratynyŋ 208 şarşy metrden astam bölıgı zaŋsyz jekeşelendırılgenı belgılı boldy. Sot atalǧan mämılelerdı jaramsyz dep tanydy.
Dauly nysandardyŋ bırı – Qazybek bi köşesı, 30 mekenjaiyndaǧy №4 oqu-sport korpusy. Jalpy aumaǧy şamamen 1400 şarşy metr bolatyn ǧimarat 2003 jyly universitettıŋ sol kezdegı rektory Toqmūhamed Sadyqov pen «Firma Zurab» JŞS (qazırgı «ST Advisory» JŞS) arasynda jasalǧan kelısım boiynşa tömen baǧamen – 5 million teŋgeden astam somaǧa satylǧan.
Qazırgı baǧalau boiynşa nysannyŋ qūny şamamen 135 million teŋgenı qūraidy. Prokuratura deregınşe, ǧimaratty satu kezınde baǧalau jürgızılmegen, konkurs ūiymdastyrylmaǧan, şeşım uäkılettı organmen emes, jeke qabyldanǧan.
Sonymen qatar, ǧimarat jekemenşıkke ötkennen keiın universitettıŋ özıne jalǧa berılgen. Sonyŋ nätijesınde oqu orny jaldau aqysy retınde jeke tūlǧalarǧa şamamen 79 million teŋge tölegen.
Būdan bölek, prokuratura Qonaev köşesındegı aumaǧy 208,8 şarşy metr bolatyn pavilondy da memleket menşıgıne qaitardy. Būl nysan būrynǧy rektormen bailanysty tūlǧalarǧa tömen baǧamen satylyp, keiın bırneşe ret qaita satylyp, soŋynda tuystaryna syiǧa berılgen. Qazırgı taŋda būl pavilonda täulık boiy jūmys ısteitın alkogol önımderın satatyn oryn ornalasqan.
