بيىل نۇرسۇلتان نازارباەۆ قازاقستان پرەزيدەنتى قىزمەتىنەن كەتكەنىنە تۋرا جەتى جىل تولدى، دەپ حابارلايدى "ادىرنا" ۇلتتىق پورتالى.
ول 2019 جىلعى 19 ناۋرىزدا ساعات 19:00-دە حالىققا ۇندەۋ جاساپ، وكىلەتىن توقتاتۋ تۋرالى شەشىمىن جاريالاعان ەدى.
ۇندەۋىندە نازارباەۆ:
«بيىل ەلىمىزدىڭ ەڭ جوعارى لاۋازىمىنداعى قىزمەتىمدى اتقارىپ كەلە جاتقانىما 30 جىل تولادى. حالقىم ماعان تاۋەلسىز قازاقستاننىڭ تۇڭعىش پرەزيدەنتى بولۋ مۇمكىندىگىن بەردى»، – دەگەن بولاتىن.
پرەزيدەنتتىك وكىلەتتىگىن تاپسىرعاننان كەيىن ەل باسقارۋ تىزگىنى قاسىم-جومارت توقاەۆ قولىنا ءوتتى. الايدا نازارباەۆ قاۋىپسىزدىك كەڭەسىنىڭ توراعاسى جانە ەلباسى مارتەبەسى ارقىلى ساياسي ىقپالىن ساقتاپ قالدى.
وسى كەزەڭدە قوعامدا «قوس بيلىك» تۋرالى پىكىرلەر ءجيى ايتىلدى. نازارباەۆ مۇنداي اڭگىمەلەردى جوققا شىعارسا، كەيىنگى جىلدارى توقاەۆ تا قازاقستاندا قوس بيلىك بولماۋى ءتيىس ەكەنىن بىرنەشە رەت مالىمدەدى. سوڭعى جەتى جىل ىشىندە ەلدىڭ ساياسي سيمۆوليكاسىندا دا وزگەرىستەر بولدى. 2019 جىلى استانا قالاسى نۇر-سۇلتان دەپ وزگەرتىلىپ، 2022 جىلى قايتادان بۇرىنعى استانا اتاۋى قايتارىلدى.
2022 جىلعى قاڭتار وقيعاسى تاۋەلسىز قازاقستان تاريحىنداعى ەڭ ءىرى داعدارىستاردىڭ ءبىرى بولدى. العاشىندا گاز باعاسىنىڭ قىمباتتاۋىنا بايلانىستى باستالعان نارازىلىقتار ەلدىڭ بىرقاتار وڭىرىندە تارتىپسىزدىككە ۇلاستى. رەسمي دەرەك بويىنشا، 238 ادام قازا تاپتى. وسى وقيعادان كەيىن نازارباەۆ قاۋىپسىزدىك كەڭەسى توراعاسى قىزمەتىنەن كەتتى جانە ءوزىن «زەينەتكەرمىن» دەپ جاريالادى. ول بارلىق بيلىك توقاەۆتىڭ قولىندا ەكەنىن اتاپ ءوتتى.
قاڭتار وقيعاسىنان كەيىن بىرقاتار ساياسي رەفورمالار جۇرگىزىلدى. سونىڭ ىشىندە نازارباەۆتىڭ ەلباسى مارتەبەسى الىنىپ تاستالدى. بۇل ونىڭ ساياسي جۇيەدەگى ينستيتۋتسيونالدىق ءرولىنىڭ تولىق اياقتالعانىن كورسەتتى. 2023 جىلى نازارباەۆ 700 بەتتەن تۇراتىن «مەنىڭ ءومىرىم» اتتى مەمۋارىن جاريالادى. كىتاپتا ول قاڭتار وقيعاسىنا «بيلىك ءۇشىن كۇرەس» سەبەپ بولعانىن جازدى. سونداي-اق، العاش رەت ءوزىنىڭ ەكى ۇلى بار ەكەنىن اشىق مالىمدەدى.
سوڭعى جىلدارى نازارباەۆ قوعامدىق ومىرگە سيرەك ارالاسادى. سوعان قاراماستان، ول كەيبىر ماڭىزدى ساياسي وقيعالاردا، سونىڭ ىشىندە سايلاۋ مەن رەفەرەندۋمداردا كورىنىپ تۇرادى.
