Biyl Nūrsūltan Nazarbaev Qazaqstan Prezidentı qyzmetınen ketkenıne tura jetı jyl toldy, dep habarlaidy "Adyrna" ūlttyq portaly.
Ol 2019 jylǧy 19 nauryzda saǧat 19:00-de halyqqa ündeu jasap, ökıletın toqtatu turaly şeşımın jariialaǧan edı.
Ündeuınde Nazarbaev:
«Biyl elımızdıŋ eŋ joǧary lauazymyndaǧy qyzmetımdı atqaryp kele jatqanyma 30 jyl tolady. Halqym maǧan täuelsız Qazaqstannyŋ Tūŋǧyş Prezidentı bolu mümkındıgın berdı», – degen bolatyn.
Prezidenttık ökılettıgın tapsyrǧannan keiın el basqaru tızgını Qasym-Jomart Toqaev qolyna öttı. Alaida Nazarbaev Qauıpsızdık keŋesınıŋ töraǧasy jäne Elbasy märtebesı arqyly saiasi yqpalyn saqtap qaldy.
Osy kezeŋde qoǧamda «qos bilık» turaly pıkırler jiı aityldy. Nazarbaev mūndai äŋgımelerdı joqqa şyǧarsa, keiıngı jyldary Toqaev ta Qazaqstanda qos bilık bolmauy tiıs ekenın bırneşe ret mälımdedı. Soŋǧy jetı jyl ışınde eldıŋ saiasi simvolikasynda da özgerıster boldy. 2019 jyly Astana qalasy Nūr-Sūltan dep özgertılıp, 2022 jyly qaitadan būrynǧy Astana atauy qaitaryldy.
2022 jylǧy Qaŋtar oqiǧasy täuelsız Qazaqstan tarihyndaǧy eŋ ırı daǧdarystardyŋ bırı boldy. Alǧaşynda gaz baǧasynyŋ qymbattauyna bailanysty bastalǧan narazylyqtar eldıŋ bırqatar öŋırınde tärtıpsızdıkke ūlasty. Resmi derek boiynşa, 238 adam qaza tapty. Osy oqiǧadan keiın Nazarbaev Qauıpsızdık keŋesı töraǧasy qyzmetınen kettı jäne özın «zeinetkermın» dep jariialady. Ol barlyq bilık Toqaevtyŋ qolynda ekenın atap öttı.
Qaŋtar oqiǧasynan keiın bırqatar saiasi reformalar jürgızıldı. Sonyŋ ışınde Nazarbaevtyŋ Elbasy märtebesı alynyp tastaldy. Būl onyŋ saiasi jüiedegı institusionaldyq rölınıŋ tolyq aiaqtalǧanyn körsettı. 2023 jyly Nazarbaev 700 betten tūratyn «Menıŋ ömırım» atty memuaryn jariialady. Kıtapta ol Qaŋtar oqiǧasyna «bilık üşın küres» sebep bolǧanyn jazdy. Sondai-aq, alǧaş ret özınıŋ ekı ūly bar ekenın aşyq mälımdedı.
Soŋǧy jyldary Nazarbaev qoǧamdyq ömırge sirek aralasady. Soǧan qaramastan, ol keibır maŋyzdy saiasi oqiǧalarda, sonyŋ ışınde sailau men referendumdarda körınıp tūrady.
