جامبىل وبلىسىندا «زاڭ جانە ءتارتىپ» مەملەكەتتىك يدەولوگياسىن ىسكە اسىرۋ اياسىندا «جولداعى قابىلداۋ» پروفيلاكتيكالىق اكتسياسى وتكىزىلدى.
ءىس-شارانىڭ نەگىزگى ماقساتى — تۇرعىنداردىڭ وزەكتى ماسەلەلەرىن جەدەل شەشۋ جانە حالىقتىڭ قۇقىقتىق ساۋاتتىلىعىن ارتتىرۋ.
اكتسيا بارىسىندا اكىمشىلىك پوليتسيا، قوعامدىق قاۋىپسىزدىك جانە كوشى-قون قىزمەتىنىڭ قىزمەتكەرلەرى قوعامدىق ورىنداردا ازاماتتاردى قابىلدادى. ءوڭىر تۇرعىندارىنا قولدانىستاعى زاڭناما نورمالارى بويىنشا كەڭەستەر مەن ءتۇسىندىرۋ جۇمىستارى جۇرگىزىلدى.
ءبىر كۇن ىشىندە بارلىعى 107 ادام كومەككە جۇگىندى. قابىلداۋعا كەلگەن ازاماتتار تۇرعىن ءۇي-كوممۋنالدىق شارۋاشىلىعى، شەتەل ازاماتتارى ءۇشىن ىقتيارحات پەن جۇمىس ىستەۋگە رۇقساتتاردى راسىمدەۋ، قىلمىستىق ىستەردىڭ تەرگەلۋ بارىسى، جۇرگىزۋشى كۋالىكتەرىن اۋىستىرۋ، بەينەكامەرالار مەن جولدارعاجاساندى كەدەرگىلەر ورناتۋ، سونداي-اق ىشكى ىستەر ورگاندارىنا جۇمىسقا ورنالاسۋ ماسەلەلەرى بويىنشا ساۋالدارىن قويدى.
ءاربىر ءوتىنىش بويىنشا جان-جاقتى جاۋاپتار بەرىلىپ، قاجەتتى ۇسىنىمدار جاسالدى.
اتالمىش اكتسيالار حالىق پەن پوليتسيا اراسىنداعى اشىق ءارى ءتيىمدى ديالوگتى قالىپتاستىرۋعا، سونداي-اق قوعامداعى قۇقىقتىق مادەنيەتتى ارتتىرۋعا ىقپال ەتەدى.
