تۇركىستان وبلىسىندا تۇرعىنداردىڭ ءومىر ساپاسىن ارتتىرۋعا باعىتتالعان جوبالار جالعاسۋدا. سونىڭ ءبىرى – سايرام اۋدانى اقسۋ اۋىلىنداعى ورتالىق ساياباقتىڭ جاڭارتىلۋى.
جاڭا نىسان 1 مامىر – قازاقستان حالقىنىڭ بىرلىگى كۇنى مەرەكەسىنە وراي پايدالانۋعا بەرىلدى.
جاڭارتىلعان ساياباقتا زاماناۋي ينفراقۇرىلىم تولىق قامتىلعان. اۋماعىندا سۋبۇرقاق ورناتىلىپ، اينالاسى كوگالداندىرىلعان. دەمالىس ايماعىندا 20-عا جۋىق اتتراكتسيون جۇمىس ىستەيدى. سونىمەن قاتار كەلۋشىلەرگە ارنالعان فۋد-كورت ايماقتارى مەن تىنىعۋ ورىندارى قاراستىرىلعان. جوبا ينۆەستورلار ەسەبىنەن جۇزەگە اسىرىلىپ، شامامەن 675 ميلليون تەڭگە ينۆەستيتسيا تارتىلعان.
سالتاناتتى شاراعا ءوڭىر باسشىسى نۇرالحان كوشەروۆ قاتىسىپ، تۇرعىنداردى مەرەكەمەن قۇتتىقتادى. ول ءوز سوزىندە بۇل كۇن ەلدەگى تاتۋلىق پەن كەلىسىمنىڭ سيمۆولى ەكەنىن اتاپ ءوتتى. سونداي-اق پرەزيدەنت تاپسىرمالارى اياسىندا وڭىردە ەتنوسارالىق كەلىسىمدى نىعايتۋ باعىتىندا جۇيەلى جۇمىستار جۇرگىزىلىپ جاتقانىن جەتكىزدى.
قازىرگى تاڭدا سايرام اۋدانىندا 243 مىڭنان استام حالىق تۇرادى. مۇندا 39 ەتنوس وكىلدەرى بىرلىكتە ءومىر ءسۇرىپ كەلەدى.
جاڭارتىلعان ساياباق اۋدان تۇرعىندارى مەن قوناقتارى ءۇشىن جاڭا دەمالىس ورنىنا اينالىپ، ءوڭىردىڭ الەۋمەتتىك ينفراقۇرىلىمىن دامىتۋعا ىقپال ەتپەك.
