استانادا ءوتىپ جاتقان «اۋىل» حالىقتىق-دەموكراتيالىق پاتريوتتىق پارتياسىنىڭ كەزەكتەن تىس XXVI سەزىندە قازاقستان رەسپۋبليكاسى قۇرىلتايى دەپۋتاتتىعىنا ۇسىنىلاتىن كانديداتتاردىڭ پارتيالىق ءتىزىمى بەكىتىلدى.
پارتيا قۇرىلتاي دەپۋتاتتىعىنا بارلىعى 69 كانديداتتى ۇسىندى. ولاردىڭ 71%-ى ەر ازاماتتار، 29%-ى ايەلدەر. سونىمەن قاتار تىزىمگە مۇگەدەكتىگى بار 6 ازامات ەنگىزىلگەن. بۇل جالپى كانديداتتار سانىنىڭ 8,7%-ىن قۇرايدى.
جاس قۇرامى بويىنشا ۇمىتكەرلەردىڭ باسىم بولىگى – 35 پەن 55 جاس ارالىعىنداعى ازاماتتار. ولاردىڭ ۇلەسى 56,5% بولسا، 25-35 جاس ارالىعىنداعى جاستاردىڭ ۇلەسى 14,5% بولدى. پارتيا مالىمەتىنشە، كانديداتتار ەلىمىزدىڭ ءار ءوڭىرى مەن ءتۇرلى سالا وكىلدەرىنەن جاساقتالعان.
سەزدە پارتيا توراعاسى قايرات ايتۋعانوۆ فورۋمعا قاتىسۋ ءۇشىن بارلىق وڭىردە وتكەن پارتيالىق كونفەرەنتسيالاردا 150 دەلەگات سايلانعانىن ايتتى.
پارتيا توراعاسىنىڭ ايتۋىنشا، سەزدە پارتيانىڭ الداعى باعىتىن ايقىندايتىن ماڭىزدى شەشىمدەر قابىلدانادى. ونىڭ سوزىنشە، الدا ەلدىڭ قوعامدىق-ساياسي ومىرىندەگى ماڭىزدى كەزەڭ – كەزەكتى ەلەكتورالدىق ناۋقان تۇر.
كەزەكتەن تىس XXVI سەزدە پارتيانىڭ سايلاۋالدى باعدارلاماسى، قازاقستان رەسپۋبليكاسى قۇرىلتايى دەپۋتاتتىعىنا ۇسىنىلاتىن كانديداتتاردىڭ پارتيالىق ءتىزىمى جانە ساياسي كەڭەستىڭ جاڭا قۇرامى بەكىتىلدى.
