قازاقستاننان قىتايعا 2,6 مىڭ ليتردەن استام ديزەل وتىنىن زاڭسىز الىپ وتپەك بولعان ارەكەتكە توسقاۋىل قويىلدى، دەپ حابارلايدى "ادىرنا" ءتىلشىسى.
بۇل تۋرالى شىعىس قازاقستان وبلىسى بويىنشا مەملەكەتتىك كىرىستەر دەپارتامەنتى حابارلادى.
قازاقستاننان ديزەل وتىنىن زاڭسىز الىپ وتپەك بولعاندار ۇستالدى
وقيعا وتكەن اپتادا «مايقاپشاعاي» كەدەن بەكەتىندە تىركەلگەن. قازاقستاننان قىتايعا بەت العان بوس جۇك كولىكتەرىن كەدەندىك تەكسەرۋ بارىسىندا قىتاي ازاماتتارى باسقارعان ءتورت جۇك كولىگىنەن زاۋىتتىق قۇرىلىمدا قاراستىرىلماعان، جانار-جاعارمايدى جاسىرىن تاسىمالداۋعا ارنالعان قوسىمشا وتىن باكتارى انىقتالعان.
تەكسەرۋ ناتيجەسىندە زاڭسىز شىعارىلماق بولعان ديزەل وتىنىنىڭ جالپى كولەمى شامامەن 2 640 ءليتردى (2 توننادان استام) قۇرادى.
ۆەدومستۆونىڭ مالىمەتىنشە، بۇل وتىن گۋمانيتارلىق كومەككە، عىلىمي ماقساتتاعى سەرتيفيكاتتالعان سىنامالارعا نەمەسە كولىكتىڭ ستاندارتتى جانارماي باگىنداعى كولەمگە جاتپايدى. سوندىقتان بۇل ارەكەت قازاقستاندا قولدانىستاعى جانار-جاعارماي ونىمدەرىن شىعارۋعا قويىلعان تىيىمدى بۇزۋ رەتىندە باعالانىپ وتىر.
قىتايدىڭ ءتورت ازاماتى اكىمشىلىك قۇقىق بۇزۋشىلىق تۋرالى كودەكستىڭ 590-بابىنىڭ 7-بولىگى بويىنشا اكىمشىلىك جاۋاپكەرشىلىككە تارتىلدى. ارقايسىسىنا 32 437,5 تەڭگە كولەمىندە ايىپپۇل سالىندى.
قۇقىق بۇزۋشىلىققا قاتىستى جينالعان بارلىق ماتەريالدار، ونىڭ ىشىندە تەكسەرۋ حاتتامالارى، تۇسىنىكتەمەلەر مەن فوتوماتەريالدار، پروتسەسسۋالدىق شەشىم قابىلداۋ ءۇشىن شىعىس قازاقستان وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنە جولداندى.
