يراننىڭ حورموزگان پروۆينتسياسىنداعى ميناب قالاسىندا باستاۋىش مەكتەپكە جاسالعان شابۋىل كەزىندە قازا تاپقان وقۋشىلادىڭ ءمايىت قالدىقتارىن جەرلەۋ ءراسىمى ءوتتى. بۇل تۋرالى Tasnim News اگەنتتىگى جازدى، دەپ حابارلايدى "ادىرنا".
اگەنتتىكتىڭ مالىمەتىنشە، جەرلەۋ راسىمىندە ىزدەستىرۋ-قۇتقارۋ جۇمىستارى بارىسىندا تابىلعان 68 سۇيەك قالدىعى جەر قوينىنا تاپسىرىلدى. ساراپتاما ناتيجەسىندە ولاردىڭ ميناب قالاسىنداعى «شاجارە-يە تايەبە» باستاۋىش قىزدار مەكتەبىندە قازا تاپقان 34 وقۋشى قىزعا تيەسىلى ەكەنى انىقتالعان.
يران بيلىگىنىڭ مالىمەتىنە سايكەس، مەكتەپكە جاسالعان زىمىران سوققىسى 2026 جىلعى 28 اقپاندا، اقش پەن ءيزرايلدىڭ يرانعا قارسى اسكەري وپەراتسياسى باستالعان كۇنى تىركەلگەن.
رەسمي اقپارات بويىنشا، شابۋىل سالدارىنان 170-تەن استام ادام كوز جۇمعان. قازا بولعانداردىڭ باسىم بولىگىن اتالعان مەكتەپتىڭ وقۋشىلارى قۇراعان.
يران بيلىگى بۇل وقيعانى ەل تاريحىنداعى ەڭ اۋىر گۋمانيتارلىق قاسىرەتتەردىڭ ءبىرى رەتىندە باعالاپ وتىر. تەرگەۋ جانە ىزدەستىرۋ جۇمىستارىنىڭ ناتيجەسىندە تابىلعان سۇيەك قالدىقتارى ارنايى راسىممەن جەرلەندى.
