الماتىدا كولىكتى تۇراققا قويۋ تارتىبىنە بىرقاتار وزگەرىس ەنگىزىلەدى. قالالىق ءماسليحات جول قوزعالىسىن ۇيىمداستىرۋ قاعيدالارىن بەكىتتى، دەپ حابارلايدى "ادىرنا" ءتىلشىسى.
قۇجات 5 تامىزدا رەسمي جاريالاندى، 16 تامىزدان باستاپ رەسمي كۇشىنە ەنەدى.
جاڭا ەرەجەگە سايكەس، قالاداعى اقىلى تۇراقتاردىڭ جۇمىس ۋاقىتى ۇزارادى. قازىر تۇراقتار ساعات 19:00-گە دەيىن اقىلى بولسا، 16 تامىزدان باستاپ بۇل ۋاقىت 20:00-گە دەيىن جالعاسادى. اقىلى تۇراق ورىندارى كوك ءتۇستى ۇزىك سىزىقپەن بەلگىلەنەدى.
سونىمەن قاتار تۇراق اقىسىن ەسەپتەۋ ءتارتىبى وزگەرەدى. «الماتى پاركينگ» اقىنى ساعات بويىنشا ەمەس، مينۋت سايىن ەسەپتەيتىن بولادى. ءبىر مينۋتقا بەلگىلەنەتىن ناقتى تاريف ازىرگە جاريالانعان جوق.
كوپپاتەرلى تۇرعىن ۇيدەگى پاتەر جانە تۇرعىن ەمەس ءۇي-جايلاردىڭ يەلەرى مەن جالعا الۋشىلارى ءۇشىن جەڭىلدىك قاراستىرىلعان. ولار ءۇي ورنالاسقان جەردەن 500 مەتر راديۋستاعى ءبىر تۇراق ورنىن تەگىن پايدالانا الادى. بۇل مۇمكىندىك ءبىر ۇيدەن ءبىر كولىككە بەرىلەدى. الايدا ەرەجە بيزنەس-ورتالىقتارعا قولدانىلمايدى.
تەگىن تۇراق ورنىن پايدالانۋ ءۇشىن ازامات باسقارۋشى ۇيىمعا نەمەسە «الماتى پاركينگ» ينتەرنەت-رەسۋرسى ارقىلى ءوتىنىش بەرۋى كەرەك. وتىنىشتەردى «eOtinish» پلاتفورماسى ارقىلى دا قابىلداۋ مۇمكىندىگى قاراستىرىلعان.
كومپانيانىڭ call-ورتالىعىنىڭ مالىمەتىنشە، وتىنىشتەردى قابىلداۋ 16 تامىزدان باستالادى. تەگىن تۇراققا رۇقسات الۋ مەرزىمى ازىرگە ناقتىلانباعان.
سونداي-اق اقىلى تۇراقتارعا مەملەكەتتىك ءنومىرى جارامسىز، دۇرىس ورناتىلماعان، توزعان نەمەسە ءنومىردى سايكەستەندىرۋگە كەدەرگى كەلتىرەتىن وزگەرىستەر ەنگىزىلگەن كولىكتەردى قويۋعا بولمايدى.
جەكە موبيلدىلىك قۇرالدارىنا، ونىڭ ىشىندە ۆەلوسيپەد پەن ساموكاتتارعا ارنالعان ارنايى تۇراق ورىندارى دا قاراستىرىلعان. ولار ارنايى جول تاڭبالارىمەن بەلگىلەنەدى جانە تەگىن بولادى.
بۇدان بولەك، 16 تامىزدان باستاپ الماتىدا كولىكتى ايىپتۇراققا جەتكىزۋ جانە وندا ساقتاۋ قىزمەتى اقىلى بولادى. قىزمەت قۇنى ازىرگە بەلگىلەنگەن جوق.
