ارمەنيا پرەمەر-ءمينيسترى نيكول پاشينيان ءوزىنىڭ Telegram-ارناسىندا بىشكەكتە رەسەي پرەزيدەنتى ۆلاديمير پۋتينمەن وتكەن كەزدەسۋىن «وتە جاقسى» دەپ باعالادى. سونداي-اق ول الداعى ۋاقىتتا ماسكەۋگە ساپارمەن بارۋ جونىندە كەلىسىم جاسالعانىن مالىمدەدى, دەپ حابارلايدى “ادىرنا”.
ونىڭ ايتۋىنشا، تاراپتار الداعى كەزدەسۋ بارىسىندا شىنايى ءارى سىندارلى ديالوگتى جالعاستىرۋعا كەلىسكەن.
پاشينيان ماسكەۋ مەن ەرەۆان اراسىنداعى ەكىجاقتى قارىم-قاتىناستاردىڭ ماڭىزىن اتاپ ءوتۋ قاجەتتىگىن ايتتى.
«سونىمەن بىرگە جاڭا ورتادا، جاڭا جاعدايلاردا بۇل قارىم-قاتىناستار ترانسفورماتسيانى قاجەت ەتەتىنىن دە مويىنداۋىمىز كەرەك. وسى وزگەرىستەردىڭ ناتيجەسىندە ەكى ەل اراسىنداعى بايلانىستار بۇدان دا جاقسى – نەعۇرلىم سىندارلى، ءوزارا ءتيىمدى ءارى جىلى بولادى دەپ سەنەمىن»، – دەدى ارمەنيا ۇكىمەتىنىڭ باسشىسى.
