فوتو:comnews.ru
«ياندەكس» سەرۆيستەرىندەگى اقاۋدان كەيىن قازاقستاندا ازاماتتاردىڭ دەربەس دەرەكتەرىنىڭ ساقتالۋى مەن قورعالۋ ماسەلەسى قايتا كوتەرىلدى. بۇل ماسەلەنى ءماجىلىس وتىرىسىندا «ادىلەت» پارتياسىنان سايلانعان دەپۋتات ءلاززات جىلقىباەۆا قوزعاپ، باس پروكۋرور بەرىك اسىلوۆ پەن پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆكە دەپۋتاتتىق ساۋال جولدادى، دەپ حابارلايدى "ادىرنا".
دەپۋتاتتىڭ ايتۋىنشا، 11 قازاندا قازاقستاندىق پايدالانۋشىلار «ياندەكس» كومپانياسىنىڭ بىرقاتار قىزمەتىنە قول جەتكىزە الماي قالعان. كومپانيا بۇل جاعدايعا شەتەلدە ورنالاسقان ينفراقۇرىلىمنىڭ جۇمىسىنداعى اقاۋ سەبەپ بولعانىن تۇسىندىرگەن.
مينيسترلىك قازاقستان ازاماتتارىنىڭ دەربەس دەرەكتەرى ساقتالاتىن سەرۆەرلەر ەل اۋماعىندا ورنالاسقانىن مالىمدەگەنىمەن، سەرۆيستەردىڭ كەيبىر قۇرامداس بولىكتەرى شەتەلدە ورنالاسقانىن دا راستاعان. وسىعان بايلانىستى دەپۋتات پايدالانۋشىلاردىڭ جەكە مالىمەتتەرى قاي مەملەكەتتە جانە قانداي قۇقىقتىق تالاپتار نەگىزىندە وڭدەلەتىنىن ناقتىلاۋ قاجەت دەپ سانايدى.
«ازاماتتاردىڭ تەلەفون نومىرلەرى، مەكەنجايلارى، قوزعالىس باعىتتارى مەن تولەم دەرەكتەرىن كۇندەلىكتى وڭدەيتىن سەرۆيستىڭ شەتەلدەگى ينفراقۇرىلىمداعى اقاۋعا بايلانىستى توقتاۋى دەرەكتەردىڭ قايدا جانە قانداي قۇقىقتىق رەجيمدە وڭدەلەتىنىن اشىق انىقتاۋ قاجەتتىگىن كورسەتەدى»، – دەدى ءلاززات جىلقىباەۆا.
دەپۋتات كوتەرگەن تاعى ءبىر ماسەلە – ازاماتتاردىڭ جەكە مالىمەتتەرىنىڭ اشىق قولجەتىمدىلىككە شىعىپ كەتۋى.
ونىڭ مالىمەتىنشە، قىزىلوردا وبلىسىنىڭ شيەلى اۋدانىنداعى جەتى ءبىلىم بەرۋ ۇيىمى مەملەكەتتىك ساتىپ الۋ پورتالىندا 529 قىزمەتكەردىڭ دەربەس دەرەكتەرىن جاريالاعان. ال سەمەي قالاسىندا قىزمەتكەرلەردىڭ مالىمەتتەرىمەن بىرگە 344 كامەلەتكە تولماعان بالانىڭ جەكە اقپاراتى دا اشىق قولجەتىمدى بولعان.
جىلقىباەۆا بۇل جاعدايلاردا اقپاراتتى الۋ ءۇشىن اقپاراتتىق جۇيەلەردى بۇزۋدىڭ قاجەتى بولماعانىن اتاپ ءوتتى. ونىڭ سوزىنشە، ازاماتتاردىڭ مالىمەتتەرىن قورعاۋعا مىندەتتى مەكەمەلەردىڭ وزدەرى اقپاراتتىڭ جاريا بولىپ كەتۋىنە جول بەرگەن.
دەپۋتات ازاماتتار مەملەكەتتىك قىزمەتتەردى پايدالانعاندا، بانككە جۇگىنگەندە، ەمحاناعا تىركەلگەندە نەمەسە بالالارىن مەكتەپكە ورنالاستىرعاندا جەكە مالىمەتتەرىن ءتۇرلى ۇيىمدارعا ۇسىناتىنىن ەسكە سالدى. الايدا ودان كەيىن بۇل اقپاراتقا كىمنىڭ قول جەتكىزەتىنى، قانداي ماقساتتا پايدالانىلاتىنى جانە ونىڭ ساقتالۋى قالاي باقىلاناتىنى ماڭىزدى سۇراق بولىپ قالا بەرەدى.
اسىرەسە بالالاردىڭ دەرەكتەرىنە ەرەكشە نازار اۋدارۋ قاجەتتىگى ايتىلدى. ويتكەنى ولاردىڭ تۇرعىلىقتى مەكەنجايى، وقيتىن مەكتەبى، دەنساۋلىعى مەن وتباسىنىڭ الەۋمەتتىك جاعدايى تۋرالى اقپاراتتىڭ تارالۋى جەكە قاۋىپسىزدىگىنە قاتەر ءتوندىرۋى مۇمكىن.
دەپۋتات قانداي شارالار ۇسىندى؟
ءلاززات جىلقىباەۆا دەربەس دەرەكتەردى قورعاۋ سالاسىنداعى باقىلاۋدى كۇشەيتۋ ءۇشىن بىرنەشە باعىت بويىنشا جۇمىس جۇرگىزۋ قاجەت ەكەنىن مالىمدەدى.
ونىڭ ۇسىنىستارى مىنالاردى قامتيدى:
- 11 قازانداعى وقيعاعا بايلانىستى دەربەس دەرەكتەردى شەكاراارالىق بەرۋ تالاپتارىنىڭ زاڭدىلىعىن تەكسەرۋ;
- الەۋمەتتىك نىساندار مەن ولارعا قىزمەت كورسەتەتىن كومپانيالاردىڭ جەكە مالىمەتتەردى جيناۋ ءتارتىبىنىڭ زاڭعا سايكەستىگىن انىقتاۋ;
- جالپىعا قولجەتىمدى رەسۋرستاردا جاريالانباۋى ءتيىس دەرەكتەردى بۇركەمەلەۋ جونىندەگى زاڭ تالاپتارىنىڭ ورىندالۋىن تەكسەرۋ;
- وسى سالادا جۇمىس ىستەيتىن مامانداردىڭ بىلىكتىلىگىن ارتتىرىپ، جەرگىلىكتى اتقارۋشى ورگاندارعا ارنالعان بىرىڭعاي تەكسەرۋ ادىستەمەسىن ازىرلەۋ;
- دەربەس دەرەكتەرى زاڭسىز جاريالانعان ازاماتتاردىڭ قۇقىقتارىن قالپىنا كەلتىرۋ تەتىكتەرىنىڭ تيىمدىلىگىن قامتاماسىز ەتۋ.
دەپۋتاتتىڭ پىكىرىنشە، اتالعان شارالار جەكە اقپاراتتىڭ زاڭسىز تارالۋىنا جول بەرمەۋگە جانە ازاماتتاردىڭ قۇقىقتارىن قورعاۋعا باعىتتالۋى كەرەك.
ەسكە سالساق، 11 قازاندا قازاقستاندا «ياندەكس» سەرۆيستەرىنىڭ جۇمىسىندا ىركىلىستەر بايقالعان. كومپانيانىڭ تۇسىندىرۋىنشە، ونىڭ تەحنولوگيالىق قىزمەتتەرى ءارتۇرلى ەلدەردە ورنالاسقان كومپونەنتتەردەن تۇراتىن بولىنگەن ەسەپتەۋ ينفراقۇرىلىمىنا تاۋەلدى. اقاۋلارعا بايلانىستى Uber سەرۆيسىنىڭ قازاقستاندىق پايدالانۋشىلارى دا شاعىمدانعان. 2023 جىلدان بەرى اتالعان سەرۆيستىڭ جالعىز يەسى – «ياندەكس» كومپانياسى.
بۇعان دەيىن رەسەيلىك ربك باسىلىمى 8 قازانعا قاراعان ءتۇنى دروندار شابۋىلىنان كەيىن ريازان وبلىسىنداعى ساسوۆو قالاسىندا ورنالاسقان «ياندەكس» دەرەكتەر ورتالىعىندا ءورت شىققانىن حابارلاعان. باسىلىم دەرەكتەرىنە سايكەس، نىساننىڭ جۇمىسى تولىعىمەن توقتاعان.
سونداي-اق 9 قازاندا كالۋگاداعى كومپانيانىڭ دەرەكتەر ورتالىعىنا دروندار شابۋىل جاساپ، بىرنەشە مودۋل ىستەن شىققانى ايتىلعان. كومپانيا قىزمەتكەرلەر اراسىندا زارداپ شەككەندەر جوق ەكەنىن مالىمدەگەنىمەن، جابدىقتاردىڭ جۇمىسىن قالپىنا كەلتىرۋ مەرزىمىن ناقتىلاۋ قيىن ەكەنىن جەتكىزگەن.
