ەسىگى جوق كولىكپەن جۇرگەن جۇرگىزۋشىگە ايىپپۇل سالىندى

تاراز قالاسىندا الدىڭعى سول جاق ەسىگى جوق Volkswagen اۆتوكولىگىن باسقارعان جۇرگىزۋشى اكىمشىلىك جاۋاپكەرشىلىككە تارتىلدى، دەپ حابارلايدى "ادىرنا".

ول كولىكتى جوندەۋ ورنىنا جەتكىزبەك بولعان. بۇل تۋرالى جامبىل وبلىستىق پوليتسيا دەپارتامەنتى مالىمدەدى.

پاترۋلدىك پوليتسيا قىزمەتكەرلەرى تولە بي داڭعىلىندا قوزعالىپ بارا جاتقان ەسىگى جوق اۆتوكولىكتى بايقاپ، جۇرگىزۋشىنى توقتاتقان.

پوليتسيا مالىمەتىنشە، كولىك ۇزاق ۋاقىت بويى پايدالانىلماي، ءبىر ورىندا تۇرعان. جۇرگىزۋشى ونى تەحنيكالىق قىزمەت كورسەتۋ ستانتسياسىنا جەتكىزۋ ءۇشىن ەۆاكۋاتور شاقىرماي، وزدىگىنەن جۇرگىزىپ بارۋدى ۇيعارعان.

الايدا مۇنداي تەحنيكالىق اقاۋى بار كولىكتى باسقارۋ جول قوزعالىسىنا قاتىسۋشىلاردىڭ قاۋىپسىزدىگىنە قاتەر توندىرەدى. وسىعان بايلانىستى جۇرگىزۋشى اكىمشىلىك قۇقىق بۇزۋشىلىق تۋرالى كودەكستىڭ 590-بابىنىڭ 5-بولىگى بويىنشا جاۋاپقا تارتىلدى. وعان 5 اەك مولشەرىندە، ياعني 21 615 تەڭگە ايىپپۇل سالىندى.

پوليتسيا وكىلدەرى تەحنيكالىق تالاپتارعا ساي كەلمەيتىن كولىكتى جوندەۋ ورنىنا ەۆاكۋاتورمەن جەتكىزۋ قاجەتتىگىن ەسكەرتتى. بۇل جۇرگىزۋشىنىڭ دە، وزگە جول قوزعالىسىنا قاتىسۋشىلاردىڭ دا قاۋىپسىزدىگى ءۇشىن ماڭىزدى.