Vietjet Qazaqstan اۋە كومپانياسىنىڭ بىرنەشە باعىتتاعى رەيسى ۇشاقتىڭ قۇستارمەن سوقتىعىسۋىنا بايلانىستى كەشىكتىرىلدى، دەپ حابارلايدى “ادىرنا”.
وقيعا 4 قاراشادا بولعان.
اۋە كەمەسى قىزىلوردادان استاناعا باعىت العان IQ426 رەيسىن ورىنداۋ كەزىندە قۇستارمەن سوقتىعىسقان. وسىدان كەيىن ۇشاققا قوسىمشا تەحنيكالىق تەكسەرۋ جۇرگىزۋ قاجەت بولعان.
سالدارىنان اتالعان رەيستىڭ عانا ەمەس، اۋە كومپانياسىنىڭ وزگە باعىتتار بويىنشا ۇشاتىن بىرنەشە رەيسىنىڭ دە كەستەسى وزگەرگەن.
Vietjet Qazaqstan وكىلدەرىنىڭ مالىمەتىنشە، بارلىق قاجەتتى تەحنيكالىق شارا اۆياتسيالىق قاۋىپسىزدىك پەن اۋە كەمەلەرىن پايدالانۋ تالاپتارىنا سايكەس جۇرگىزىلىپ جاتىر.
اۋە كومپانياسى رەيستەر كەستەسىن مۇمكىندىگىنشە قىسقا مەرزىمدە قالپىنا كەلتىرۋ ءۇشىن ءتيىستى شارالار قابىلداپ جاتقانىن حابارلادى. سونداي-اق جولاۋشىلارعا ۇشۋ ۋاقىتى تۋرالى اقپاراتتى الدىن الا رەسمي ارنالار ارقىلى تەكسەرۋگە كەڭەس بەردى. قاجەت بولعان جاعدايدا تاسىمالداۋشى وكىلدەرىنە جۇگىنۋگە بولادى.
