سارىسۋ اۋدانى سەرپىندى دامۋدا

1624
Adyrna.kz Telegram

كەشە وڭىرلىك كوممۋنيكاتسيالار قىزمەتىنىڭ الاڭىندا سارىسۋ اۋدانى اكىمىنىڭ مىندەتىن اتقارۋشى ساكەن مامىتوۆ جانە جاڭاتاس قالاسىنىڭ اكىمى دۇيسەنالى بورسىقوۆتىڭ قاتىسۋىمەن ءباسپاسوز ءماسليحاتى ءوتتى. سپيكەرلەر بريفينگ بارىسىندا سارىسۋ وڭىرىندە بيىل اتقارىلعان جۇمىستار تۋرالى بايانداما جاسادى.

باسقوسۋدا العاشقى بولىپ ءسوز العان ساكەن ۇمبەتۇلىنىڭ ايتۋىنشا، ايماقتىڭ الەۋمەتتىك-ەكونوميكالىق دامۋىنىڭ بارلىق سالاسىندا وڭ ديناميكا قالىپتاسقان.

ەسەپتى كەزەڭدە ونەركاسىپ ءونىمىنىڭ كولەمى 26,1 ميلليارد قۇراپ، 103,7 پايىزعا، ينۆەستيتسيالاردىڭ كولەمى 10,1 ميلليارد تەڭگەگە جەتىپ، 267,7 پايىزعا ورىندالعان. اۋداندا الداعى 5 جىلعا ينۆەستيتسيالىق جوبالاردىڭ پەرسپەكتيۆالىق جوسپارى جاساقتالعان.

اۋىل شارۋاشىلىعى سالاسىندا 4 ايدا وندىرىلگەن ءونىمنىڭ كولەمى 2,6 ميلليارد تەڭگەنى قۇراپ، وتكەن جىلمەن سالىستىرعاندا 102,8 پايىزعا ارتىپ وتىر. اۋدانداعى ەگىستىك جەر كولەمى 24 717 گەكتاردى قۇراسا، 24 500 گەكتارى يگەرىلگەن. سونىمەن قاتار پايدالانىلماي جاتقان 77,6 مىڭ گەكتار جەر مەملەكەت مەنشىگىنە قايتارىلعان. ال ەلدى مەكەن جايىلىمى 110,0 مىڭ گەكتارعا ۇلعايعان.

اۋداندا مال شارۋاشىلىعى ونىمدەرىنىڭ كولەمى دە ارتۋدا. جىل باسىنان وندىرىلگەن ەت كولەمى 3 پايىزعا، ءسۇت ءونىمى 2,7 پايىزعا ارتقان.

جىل باسىنان بەرى 254,3 ميلليون تەڭگەنى قۇرايتىن 32 جاڭا تەحنيكا الىنىپ، جاڭارۋ كورسەتكىشى 4,6 پايىزعا جەتكەن. جىل اياعىنا دەيىن تەحنيكا جاڭارتۋ ۇلەسى 12,0 پايىزعا جەتەدى.

– كاسىپكەرلىكتى دامىتۋ – باستى نازاردا. بۇگىنگى كۇنگە اۋداندا 4 932 شاعىن جانە ورتا بيزنەس سۋبەكتىسى تىركەلگەن. ونىڭ 4 385-ءى بەلسەندى قىزمەت ىستەپ، وتكەن جىلدىڭ ءتيىستى كەزەڭىمەن سالىستىرعاندا 48,2 پايىزعا ارتتى. جىل باسىنان كاسىپكەرلەرگە 472 ميلليون تەڭگەگە مەملەكەتتىك قولداۋ كورسەتىلدى. قۇرىلىس جۇمىستارىنىڭ كولەمى 2023 جىلدىڭ 4 ايىندا 1,5 ميلليارد تەڭگەنى قۇراپ، 147,5 پايىزعا جەتتى .

بيىل قۇرىلىس سالاسىنا «شاعىن جانە مونو قالالاردى دامىتۋ» باعدارلاماسى اياسىندا 578,1 ميلليون تەڭگە قارجى قارالىپ وتىر. سونىمەن قاتار «بيزنەستىڭ جول كارتاسى-2025» باعدارلاماسى اياسىندا جىلدىق قۋاتى 400 مىڭ توننا كالتسيلەنگەن سودا ءوندىرۋ زاۋىتىنىڭ شەكاراسىنا دەيىن اقكول كولىنەن سۋ تارتقىشتى سالۋعا 2,1 ميلليارد تەڭگە جانە جاڭاتاس تسەمەنت زاۋىتىن ەلەكترمەن جابدىقتاۋ ءۇشىن 163,5 ميلليون تەڭگە قارجى ءبولىنىپ، بيىل اياقتالادى.

اۋداندا 4 ايدىڭ قورىتىندىسىمەن پايدالانۋعا بەرىلگەن تۇرعىن ۇيلەردىڭ جالپى كولەمى 2 467 شارشى مەتردى قۇراپ وتىر. كوممۋنالدىق تۇرعىن ءۇي قورىنان پاتەر الۋ كەزەگىندە 1 588 ادام تۇر.

بيىل حالىقتى تۇرعىن ۇيمەن قامتاماسىز ەتۋ ماقساتىندا رەسپۋبليكالىق جانە وبلىستىق بيۋدجەتتەن 2,1 ميلليارد تەڭگە قارالىپ، قازىر مەردىگەرلەردى انىقتاۋ بويىنشا كونكۋرس جۇمىستارى جۇرگىزىلۋدە، – دەدى ساكەن مامىتوۆ.


سپيكەر مۇنان سوڭ ەلدى مەكەندەردى اباتتاندىرۋ جۇمىستارى، «اۋىل – ەل بەسىگى» جوباسى، اۋىزسۋمەن قامتۋ، گازداندىرۋ، سپورت، دەنساۋلىق، مادەنيەت سالالارى بويىنشا اتقارىلعان جۇمىستارى مەن جەتكەن جەتىستىكتەرگە كەڭىنەن توقتالدى.

بريفينگ بارىسىندا جاڭاتاس قالاسىنىڭ اكىمى دۇيسەنالى بورسىقوۆتىڭ دا بايانداماسى تىڭدالدى. سپيكەر الدىمەن قالانىڭ دامۋى نەگىزدەرىنە توقتالدى.

– بۇگىنگى كۇنگە 5 ءىرى وڭدەۋ ونەركاسىبى، اتاپ ايتقاندا، «ەۆروحيم» جشس، «قازفوسفات» تكوك، «جاراس» مۇناي وڭدەۋ زاۋىتى، «اسىل تۇز» سوليانايا كومپانيا» جشس، «تاراز كولىك جولى» اسفالت ءوندىرۋ زاۋىتى تۇراقتى تۇردە جۇمىس ىستەۋدە.

بيىلعى جىلدىڭ 4 ايىندا ونەركاسىپ ونىمدەرىنىڭ قۇنى 23,7 ميلليارد تەڭگە قۇرادى، – دەدى د.بورسىقوۆ.

جالپى قالادا بۇدان دا باسقا اتقارىلىپ جاتقان جۇمىستار قىرۋار. جاڭاتاس قالاسىنىڭ اكىمى بارلىعىنا ءجىتى توقتالىپ، باق وكىلدەرىنىڭ ساۋالدارىنا جاۋاپ بەردى.

ايجان وزبەكوۆا

 

پىكىرلەر