بيىلعى جازدا اباي وبلىسىنداعى ءورت جەرگىلىكتى جانە ورتالىق توتەنشە جاعداي دەپارتامەنتى مەن بولىمدەرىنىڭ جۇمىسىنا سىن بولدى. ادىرنا پورتالى ايماقتىق توتەنشە جاعداي نىساندارىنا حابارلاسىپ، ولاردىڭ وقىس جاعدايعا قانشالىقتى دايىن ەكەنىن تەكسەرىپ كوردى. الايدا الماتى، استانا سياقتى ءىرى مەگاپوليستەر ءبىرشاما تەحنيكامەن جابدىقتالعانىمەن دە كەيبىر زامانعا ساي كەرەك-جاراقتىڭ ولقىلىعى كورىنىپ قالدى. باسقا دا وبلىستاردا شەشىلمەگەن ءتۇيىن جەتەرلىك.
بۇعان دەيىن اdyrna.kz ۇلتتىق پورتالى ەلىمىزدىڭ توتەنشە جاعدايلار دەپارتامەنتى قانشالىقتى تەحنيكامەن قامتاماسىز ەتىلگەنىن جازعان بولاتىن. استانا مەن الماتى سەكىلدى قالالاردىڭ «قاعاناعى قارق» بولعانىمەن وبلىستىڭ ولقى تۇسى بايقالىپ قالدى. ايتىپ كەلمەيتىن اپات كەزىندە ايماقتاعى توتەنشەلىكتەردىڭ تەحنيكاسى ساقاداي ساي ما؟
43 پايىزدان استام تەحنيكا ەسكىرگەن
قوستاناي وبلىسىنىڭ توتەنشە جاعدايلار دەپارتامەنت باسشىسىنىڭ ورىنباسارى ءابىل ورازوۆتىڭ ادىرناعا ايتۋىنشا، ايماقتا 204 بىرلىك اۆتوكولىك قۇرالى بار. الايدا ازاماتتىق قورعاۋ پولكوۆنيگى ونىڭ 89-نىڭ (اۆتوكولىكتىڭ جالپى سانىنىڭ 43,4 پايىزدان) پايدالانۋ مەرزىمى 15 جىلدان اسىپ كەتكەنىن جاسىرمادى.
«قوستاناي وبلىسى گارنيزونىنىڭ ءورت-قۇتقارۋ بولىمشەلەرى تيىستىلىك نورمالارىنىڭ تەك 49 پايىز جاراقتاندىرىلدى، الايدا ۇلگىلىك، جاڭا جانە قازىرگى زامانعى تالاپتارعا سايكەس كەلەتىن ءورت دەپولارى مەن قۇتقارۋ ستانتسيالارىنىڭ بولماۋىنا جانە پايدالانۋعا بەرىلۋىنە بايلانىستى بولىمشەلەردى 100 پايىز كولەمدە جاساقتاۋ ماقساتىندا تەحنيكانى ورنالاستىرۋعا ارنالعان ماشينا ورىندارىنىڭ جەتىسپەۋى بايقالادى. وسىعان قاراماستان، جىل سايىن رەسپۋبليكالىق جانە جەرگىلىكتى اتقارۋشى ورگانداردىڭ بيۋدجەتى ەسەبىنەن ءوز رەسۋرسىن ازىرلەگەن ءورت ءسوندىرۋ تەحنيكاسىن جوسپارلى اۋىستىرۋ جۇرگىزىلۋدە. وبلىس گارنيزونىندا ءورت ءسوندىرۋ جانە قۇتقارۋ تەحنيكاسىنىڭ قاجەتتى سانىنىڭ بولماۋى، جوعارىدا ايتىلعانداي، جاڭا ءورت ءسوندىرۋ دەپولارى قۇرىلىسىنىڭ بولماۋىنا بايلانىستى سەزىلەدى»، – دەيدى ول.
ايتسە دە ول وسى جىلى اۆتوكولىك قۇرالدارىن، اۆاريالىق-قۇتقارۋ جابدىقتارىن، كيىم-كەشەكتەردى ساتىپ الۋعا رەسپۋبليكالىق بيۋدجەتتەن – 908 485,5 مىڭ تەڭگە، ال جەرگىلىكتى بيۋدجەتتەن 784 000 مىڭ تەڭگە بولىنگەنىن ەسكەرتتى. سونداي-اق ءابىل ورازوۆ 2020 جىلى 512 982,0 مىڭ تەڭگە، 2021 جىلى 368 009,0 مىڭ تەڭگە، 2022 جىلى 801 408 مىڭ تەڭگە قارجى بولىنگەنىن ايتتى.
53 ءورت ءسوندىرۋ تەحنيكاسى جەتىسپەيدى
ال قوستانايمەن كورشىلەس جاتقان سولتۇستىك قازاقستان وبلىسىنىڭ توتەنشە جاعدايلار دەپارتامەنتىنىڭ جاعدايى ءبىر-بىرىمەن شامالاس. وبلىستىق توتەنشە جاعدايلار دەپارتامەنت باسشىسىنىڭ ورىنداسبارى دميتري ءراستيحيننىڭ ادىرناعا ايتۋىنشا، ايماقتىڭ تەحنيكامەن جاراقتاندىرۋ دەڭگەيى 76,7 پايىزدى قۇرايدى.
«قازىرگى ۋاقىتتا ءورت ءسوندىرۋ قىزمەتى قىزمەتىندە 175 بىرلىك ءورت ءسوندىرۋ اۆتوموبيلدەرى، ونىڭ ىشىندە: نەگىزگى ءورت ءسوندىرۋ اۆتوموبيلدەرى: – 89 بىرلىك (قوسىمشا 40 بىرلىك قاجەت), ارنايى ءورت ءسوندىرۋ اۆتوموبيلدەرى – 12 بىرلىك (قوسىمشا 4 بىرلىك قاجەت), كومەكشى تەحنيكا – 74 بىرلىك (قوسىمشا 9 بىرلىك قاجەت). ماسەلەن، 2020 جىلى تەحنيكامەن جاراقتاندىرۋ – 64,4 پايىز، 2021 جىلى – 73,2 پايىز، 2022 جىلى – 73,6 پايىز جانە اعىمداعى جىلى – 76,7 پايىز بولدى»، – دەيدى ول.
دميتري ءراستيحيننىڭ ايتۋىنشا، وبلىسقا 53 ءورت ءسوندىرۋ تەحنيكاسى قاجەت. ول بولىنگەن قاراجاتتىڭ از ەكەنىن مويىندادى. مىسالى، 2020 جىلدان باستاپ جەرگىلىكتى بيۋدجەتتەن قارجىلاندىرۋ كولەمى ورتا ەسەپپەن 200 ملن. تەڭگەدەن باستاپ قازىرگى ۋاقىتقا دەيىن شامامەن 500 ملن. تەڭگەگە ۇلعايعانىن ايتتى.
90 ءورت ءسوندىرۋ تەحنيكاسى توزعان
استانانىڭ ىرگەسىندەگى اقمولا وبلىسىنىڭ توتەنشە جاعدايلار دەپارتامەنتىنىڭ بالانسىندا 234 بىرلىك ءورت ءسوندىرۋ تەحنيكاسى بار. دەپارتامەنت باسشىسىنىڭ ورىنباسارى اسەت جاقسىلىقوۆتىڭ ادىرناعا ايتۋىنشا، قاجەتتى تەحنيكامەن ايماقتى تولىق قامتۋ ءۇشىن 13 بىرلىك نەگىزگى جانە 19 بىرلىك ارنايى تەحنيكا قاجەت.
«پايدالانۋ مەرزىمى 10 جىلدان اساتىن 90 بىرلىك تەحنيكا بولعاندىقتان، بۇل تەحنيكانى ەسەپتەن شىعارۋ بەلگىلى ءبىر ۋاقىتتى الاتىن بىرنەشە كەزەڭدە جۇزەگە اسىرىلادى. وسىعان بايلانىستى جاڭا ءورت تەحنيكاسىن ساتىپ الۋ قارجى قاراجاتىنىڭ تۇسۋىنە قاراي كەزەڭ-كەزەڭىمەن جۇزەگە اسىرىلاتىن بولادى. اعىمداعى جىلى تەحنيكالىق بازانى جاراقتاندىرۋ ءۇشىن وبلىستىق بيۋدجەتتەن 606 647 000 تەڭگە قارجى ءبولىندى. تەحنيكالىق بازانى كەزەڭ كەزەڭمەن جابدىقتاۋ ءۇشىن بولىنگەن قاراجات جەتكىلىكتى»، – دەيدى ول.
وبلىستىق توتەنشە جاعداي دەپارتامەنتىنە 2020 جىلى 352 458 000 تەڭگە، 2021 جىلى 250 666 700 تەنگە جانە وتكەن جىلى 384 338 600 تەڭگە بولىنگەن. ايتسە دە قانشا قارجى بولسە دە، ءورت ءسوندىرۋ تەحنيكاسىنىڭ 90-ى توزعان.
تەڭىز جاعاسىنداعى ايماققا 80 تەحنيكا قاجەت
سولتۇستىك قازاقستان وبلىسىنان ەلىمىزدىڭ باتىس ايماعىندا دا جاعداي وڭىپ تۇرعان جوق. مىسالى ماڭعىستاۋ وبلىسى توتەنشە جاعداي دەپارتامەنتىندە باس-اياعى 127 بىرلىك ءار ءتۇرلى ماقساتتاعى تەحنيكا بار. ال ءورت ءسوندىرۋ اۆاريالىق-قۇتقارۋ جۇمىستارى قىزمەتى» مەملەكەتتىك مەكەمەسىنىڭ باسشىسى نۇرسۇلتان مىرزاعاليەۆ ايماققا قوسىمشا 80 بىرلىك تەحنيكا قاجەت ەكەنىن ايتادى.
«اعىمداعى جىلى بارلىعى 42 بىرلىك اۆتوكولىك ساتىپ الۋ جۇمىستارى جۇرگىزىلۋدە. جەرگىلىكتى بيۋدجەت ەسەبىنەن جانە ليزينگ قاراجاتى ەسەبىنەن 40 بىرلىك ءار ءتۇرلى ماقساتتاعى اۆتوكولىك ساتىپ الۋ ءۇشىن اعىمداعى جىلى جالپى سومماسى 891 868 912 تەنگە ءبولىندى، رەسپۋبليكالىق بيۋدجەت ەسەبىنەن 2 بىرلىك اۆتوتسيستەرنا ساتىپ الۋ ءۇشىن جالپى سومماسى 201 000 000 تەنگە ءبولىندى. قازىرگى تاڭدا ءورت ءسوندىرۋ جانە اۆاريالىق-قۇتقارۋ جۇمىستارىن جۇرگىزۋگە تەحنيكالار جەتكىلىكتى»، - دەيدى ول ادىرناعا.
نۇرسۇلتان مىرزاعاليەۆتىڭ ايتۋىنشا، وبلىستىق توتەنشە جاعدايلار دەپارتامەنتىنە بولىنەتىن قاراجات كولەمى جىل سايىن ارتىپ كەلەدى. مىسالى 2020 جىلى – 2 196 262 500 تەنگە، 2021 جىلى – 2 207 686 000 تەنگە، 2022 جىلى – 2 276 319 700 تەنگە قاراجات بولىنگەن.
اتىراۋدىڭ اسىعى الشىسىنان ءتۇسىپ تۇر
ماڭعىستاۋ وبلىسىنان قاراعاندا اتىراۋ وبلىسىنىڭ جاعدايى «بەس» بولىپ شىقتى. دەپارتامەنت باسشىسىنىڭ ورىنباسارى اسحات ەرجانوۆتىڭ ادىرناعا ايتۋىنشا، وبلىس قاجەتتى تەحنيكامەن 100 پايىز قامتىلعان.
«اتىراۋ وبلىسى تجد «ءورت ءسوندىرۋ جانە اۆاريالىق-قۇتقارۋ جۇمىستارى قىزمەت» مم تەڭگەرىمىندە ءار-ءتۇرلى ماقساتتاعى 140 بىرلىك اۆتوكولىك بار. ونىڭ ىشىندە، 65 بىرلىگى – نەگىزگى، 21 بىرلىگى – ارنايى جانە 54 بىرلىگى – كومەكشى قۇرال. وبلىس اۋماعىندا ورنالاسقان 14 بىرلىك ءورت ءسوندىرۋ بولىمدەرىندە اۆتوكولىككە ارنالعان ورىنداردى ەسەپتەسەك، وبلىس قاجەتتى تەحنيكامەن 100 پايىز قامتىلعان»، – دەيدى ول.
مۇنايلى استانا سانالاتىن اتىراۋدىڭ ءورت ءسوندىرۋ تەحنيكاسىمەن 100 پايىز قامتاماسىز ەتىلگەنى قارا التىننىڭ ارقاسى شىعار. قارجى دەمەكشى جەرگىلىكتى بيۋدجەتتەن ايماقتىڭ توتەنشە جاعدايلار دەپارتامەنتىنە 2020 جىلى – 193384,0 مىڭ تەڭگە، 2021 جىلى – 152320,0 مىڭ تەڭگە جانە بىلتىر 924692,0 مىڭ تەڭگە ءبولىنىپتى.
باتىستىڭ ءبۇيىرى ءبۇتىن ەمەس
باتىس قازاقستان وبلىسىنىڭ توتەنشە جاعدايلار دەپارتامەنتىندە نەگىزگى، ارنايى جانە كومەككە تاعايىندالعان 195 تەحنيكا بىرلىگى بار. دەپارتامەنت باسشىسىنىڭ ورىنباسارى راشيد بليالوۆتىڭ ادىرناعا ايتۋىنشا، وبلىستىڭ بەكىتىلگەن نورماعا سايكەس جالپى جابدىقتالۋى 87 پايىزدى قۇرايدى. ياعني تولىق جاساقتاۋعا دەيىن 29 بىرلىك تەحنيكا ساتىپ الۋ قاجەت.
«قازىرگى ۋاقىتتا ءورت سوندىرۋگە ارنالعان كوپ فۋنكتسيونالدى (گازبەن-سۋمەن (بۋمەن-سۋمەن سوندىرەتىن) اۆتوموبيل، روبوتتاندىرىلعان ءورت ءسوندىرۋ پلاتفورماسى (روبوتوتەحنيكا), اۆتوكوبىككوتەرگىش، پيلوتسىز ۇشۋ اپپاراتتارى، گيدروتسيكلدەر، كۆادروتسيكلدەر ءتارىزدى تەحنيكالاردىڭ تاپشىلىعى سەزىلەدى»، – دەيدى ول.
دەپارتامەنتكە وبلىستىق بيۋدجەتتەن 2020 جىلى – 479180,8 مىڭ، 2021 جىلى – 633938,7 مىڭ جانە 2022 جىلى – 223108,6 مىڭ تەڭگە قاراجات ءبولىنىپ، توتەنشە جاعدايلاردى جويۋ تەحنيكالارى مەن قۇرال-جابدىقتارىن ساتىپ الۋ جۇمىستارى جۇرگىزىلىپ جاتىر.
اقتوبەدە ءورت ءسوندىرۋ تەحنيكاسى از
اقتوبە وبلىسى توتەنشە جاعدايلار دەپارتامەنتىنىڭ باسشىسى مارعۇلان امانباەۆتىڭ ادىرناعا ايتۋىنشا، وبلىستا جالپى سانى 316 بىرلىك ءار-ءتۇرلى ماقساتتاعى ءورت ءسوندىرۋ تەحنيكاسى بار.
«قازىرگى تاڭدا جاۋىنگەرلىك ەسەپتە 195 بىرلىك اۆتوكولىك تۇر. قامتاماسىز ەتۋ نورماسىنا سايكەس، ءارتۇرلى ماقساتتاعى ءورت ءسوندىرۋ تەحنيكاسىمەن 61,7 پايىزعا قامتاماسىز ەتىلگەن. وبلىستاعى جاعدايعا وراي قىزمەت ەسەبىندەگى ءورت ءسوندىرۋ اۆتوكولىكتەرىنىڭ سانى ۇلكەن توتەنشە جاعدايلارعا جەدەل ارەكەت ەتۋگە جانە تەز ارادى جويۋعا جەتكىلىكسىز. اتاپ ايتقاندا، مۇناي جانە گاز كەن ورىندارى مەن بيىك عيماراتتارداعى تج جويۋعا ارنالعان ارنايى ءورت ءسوندىرۋ تەحنيكالارى قاجەت ەتەدى»، – دەيدى ول.
اقتوبە وبلىسىنىڭ توتەنشە جاعدايلار دەپارتامەنتىنە 2020 جىلى – 506,4 ملن. تەڭگە، 2021 جىلى – 1 151,3 ملن. تەڭگە جانە 2022 جىلى – 1 111,6 ملن. تەڭگە قاراجات جەرگىلىكتى بيۋدجەت ەسەبىنەن بولىنگەن.
جەتىسۋ «جەتىسىپ» تۇرعان جوق
جەتىسۋ وبلىسى توتەنشە جاعدايلار دەپارتامەنتى باسشىسىنىڭ ورىنباسارى قانات التىنبەكوۆتىڭ ادىرناعا ايتۋىنشا، وبلىستى 63 بىرلىك قوسىمشا كولىكپەن جابدىقتاۋ قاجەت.
«قازاقستان رەسپۋبليكاسى توتەنشە جاعدايلار مينيسترلىگى جەتىسۋ وبلىسى تجد وق جانە اقجق» رمم قازىرگى ۋاقىتتا نورماتيۆتىك قۇجاتتارعا سايكەس، بارلىق قاجەتتى ءورت ءسوندىرۋ اۆتوكولىكتەرىمەن تولىق قامتاماسىز ەتىلمەگەن. ءتۇرلى سيپاتتاعى توتەنشە جاعدايلاردان حالىقتى قورعاۋ بويىنشا جۇزەگە اسىرىلاتىن شارالاردىڭ كوپ ۆەكتورلىلىعىن ەسكەرە وتىرىپ، اۆتوكولىك پاركىندە ءارتۇرلى ماقساتتارعا ارنالعان اۆتوكولىكتەر بار. دەگەنمەن، توتەنشە جاعدايلاردى جويۋعا جانە حالىقتى قۇتقارۋ جۇمىستارىنا باسىم بولىگىن ءورت ءسوندىرۋ كولىكتەرىنىڭ جۇمىسىنا تۇسەدى. ازاماتتىق قورعاۋ ورگاندارىنىڭ اۆتوكولىك پاركىنىڭ مەرزىمدى جاڭارۋىنا، ەلدى مەكەندەر سانىنىڭ وسۋىنە، سونداي-اق حالىقتى توتەنشە جاعدايلاردىڭ بارلىق جاعدايلاردان قورعاۋعا ارنالعان ازاماتتىق قورعاۋ ورگاندارىنىڭ جاڭا بولىمشەلەرىنىڭ اشىلۋىنا بايلانىستى قاجەتتى كولىك سانى جەتكىلىكسىز. وسىعان بايلانىستى ازاماتتىق قورعاۋ ورگاندارىنىڭ بولىمشەلەرىن قاجەتتى ءورت ءسوندىرۋ اۆتوكولىكتەرىمەن تولىقتىرۋ بويىنشا بارلىق قاجەتتى شارالار تۇراقتى تۇردە جۇرگىزىلۋدە»، – دەيدى ول.
سونداي-اق ول جەتىسۋ وبلىسىنىڭ قۇرىلعانىنا ءبىر جىل عانا بولعانىنا بايلانىستى قارجى رەسۋرستارىنىڭ كولەمىن انىقتاۋ ماسەلەسى بويىنشا تالدامالىق زەرتتەۋلەر جۇرگىزۋ مۇمكىن ەمەس ەكەنىن ەسكەرتتى.
سەرىك جولداسباي
«ادىرنا» پورتالى
